நடிகர் ரஜினிகாந்த், ஜெயிலர்-2 திரைப்படத்தில் நடித்து வருகிறார். இந்த படத்துக்கான பணிகளில் கலந்து கொள்வதற்காக, நேற்று மதியம் சென்னையில் இருந்து விமானம் மூலம் ஹைதராபாத் சென்றார். முன்னதாக, சென்னை விமான நிலையத்தில் ரஜினிகாந்த் செய்தியாளர்களிடம் கூறுகையில், “ஜெயிலர்-2 படத்தின் பணிகள் முடிவடையும் நிலையில் உள்ளது. படம் வெளியாகும் தேதி குறித்து விரைவில் அறிவிப்பார்கள். நானும், கமலும் இணைந்து நடிக்கும் படம் ஆகஸ்ட் மாதம் தொடங்குகிறது” என்றார்.
அப்போது, தேர்தல் நெருங்கி வருகிறது. மக்களுக்கு என்ன சொல்ல விரும்புகிறீர்கள் என்று செய்தியாளர்கள் கேட்டதற்கு, வணக்கம் என்று கையெடுத்து கும்பிட்டார். தொடர்ந்து, நீங்கள் தேர்தல் பிரச்சாரத்தில் ஈடுபட வாய்ப்புள்ளதா என்ற கேள்விக்கும், சிரித்து கொண்டே, ‘நோ கமெண்ட்ஸ்’ என்று ரஜினிகாந்த் தெரிவித்தார்.
