தியாகி இமானுவேல் சேகரன் நினைவிடத்தில் அரசு சார்பில் மலர்வளையம் வைத்து அஞ்சலி செலுத்திய அமைச்சர்கள் நிர்மல்குமார், அருண்ராஜ்
பரமக்குடி: தியாகி இமானுவேல் சேகரனின் 69-வது நினைவு தினத்தையொட்டி ராமநாதபுரம் மாவட்டம் பரமக்குடியில் உள்ள அவரது நினைவிடத்தில் அரசியல் தலைவர்கள் மரியாதை செலுத்தினர். இதையொட்டி 8 ஆயிரம் போலீஸார் பாதுகாப்புப் பணியில் ஈடுபட்டிருந்தனர்.
தியாகி இமானுவேல் சேகரனின் நினைவு தினத்தையொட்டி அங்கு பல்வேறு ஏற்பாடுகள் செய்யப்பட்டிருந்தன. நினைவிடத்தில் முதலில் இமானுவேல் சேகரனின் சொந்த ஊரான செல்லூர் கிராம மக்கள் சார்பில் மரியாதை செலுத்தப்பட்டது. பின்னர் இமானுவேல் சேகரன் குடும்பத்தினரான அவரது மகள் சுந்தரி பிரபாராணி, பேரன்கள் சக்கரவர்த்தி, ஆரோக்கிய கோமன், ஜீவன் ஆகியோர் மரியாதை செலுத்தினர். அதைத் தொடர்ந்து தேவேந்திர பண்பாட்டுக் கழகம் சார்பில் மரியாதை செலுத்தப்பட்டது.
தவெக சார்பில் அமைச்சர் நிர்மல்குமார் மலர்வளையம் வைத்து மரியாதை செலுத்தினார். அமைச்சர்கள் கோ.கா.அருண்ராஜ், டி.கே.பிரபு, மதன்ராஜா, ராஜீவ், எம்எல்ஏக்கள் சபரி ஐங்கரன் (பெரியகுளம்), இளங்கோவன் (மானாமதுரை), கார்த்திக் (ஸ்ரீவில்லிபுத்தூர்), அய்யனார் (நிலக்கோட்டை), கார்த்திகேயன் (மதுரை கிழக்கு), கோபிசன் (மதுரை தெற்கு), கருப்பையா (சோழவந்தான்) உள்ளிட்டோர் உடன் இருந்தனர்.
எதிர்க்கட்சித் தலைவர் உதயநிதி உள்ளிட்டோர். படங்கள்: எல்.பாலச்சந்தர்.
இதேபோல் திமுக சார்பில் எதிர்க்கட்சித் தலைவர் உதயநிதி மலர் வளையம் வைத்து மரியாதை செலுத்தினார். முன்னாள் அமைச்சர்கள் பெரியகருப்பன், ராஜகண்ணப்பன், எம்எல்ஏக்கள் காதர்பாட்சா, பொன்முத்துராமலிங்கம், கதிரவன் உள்ளிட்டோர் உடன் இருந்தனர்.
அதிமுக சார்பில் முன்னாள் அமைச்சர் ஆர்.பி.உதயகுமார், மணிகண்டன், ராமநாதபுரம் மாவட்டச் செயலாளர் முனியசாமி உள்ளிட்டோர் மரியாதை செலுத்தினர். மேலும், பாஜக மாநில தலைவர் நயினார் நாகேந்திரன், நடிகை கஸ்தூரி, முன்னாள் தமிழக காங்கிரஸ் தலைவர் செல்வப்பெருந்தகை, சுற்றுலாத் துறை அமைச்சர் ராஜேஷ்குமார், நாம் தமிழர் கட்சி தலைமை ஒருங்கிணைப்பாளர் சீமான், அமமுக பொதுச் செயலாளர் டிடிவி தினகரன், தேமுதிக நகரச் செயலாளர் அன்பு தட்சிணாமூர்த்தி, விசிக சார்பில் சமூக நீதித்துறை அமைச்சர் வன்னியரசு, புதிய தமிழகம் கட்சித் தலைவர் கிருஷ்ணசாமி, மதிமுக சார்பில் சதன் திருமலைக்குமார், பாமக பொதுச் செயலாளர் வடிவேல் ராவணன், வீ த லீடர்ஸ் அமைப்பின் சார்பில் தரணி முருகேசன், எஸ்டிபிஐ கட்சியின் சார்பாக மாநில தலைவர் நெல்லை முபாரக் உள்ளிட்டோரும் மரியாதை செலுத்தினர்.
ராமநாதபுரம் மாவட்ட எஸ்பி சந்தீஷ் தலைமையில் 8 ஆயிரம் போலீஸார் பாதுகாப்பு பணியில் ஈடுபட்டிருந்தனர். விதிமீறல்களை தடுக்க ராமநாதபுரம் மாவட்டம் முழுவதும் 38 சோதனைச் சாவடிகள் அமைக்கப்பட்டிருந்தன. பரமக்குடி மற்றும் சுற்றுவட்டார பகுதிகளில் 700 கண்காணிப்பு கேமராக்கள் பொருத்தப்பட்டு பரமகுடி நகர் காவல் நிலைய கட்டுப்பாட்டு அறையில் தொடர்ந்து கண்காணிக்கப்பட்டது.