இஸ்ரோ தலைவர் வி.நாராயணன் | கோப்புப் படம்
சென்னை: சென்னை போரூரில் உள்ள ஸ்ரீராமச்சந்திரா உயர் கல்வி மற்றும் ஆராய்ச்சி நிறுவனத்தில் பட்டமளிப்பு விழா நேற்று நடந்தது.
இந்த விழாவில் பங்கேற்ற இந்திய விண்வெளி ஆராய்ச்சி நிறுவனத்தின் (இஸ்ரோ) தலைவர் வி.நாராயணன், செவிலியர், மருத்துவ ஆராய்ச்சி, உயிரி மருத்துவம் மற்றும் தொழில்நுட்பத்துறை, கேட்பியல் மற்றும் பேச்சு மொழித்துறை, செயல்முறை மருத்துவம் மற்றும் சமூக அறிவியல் துறையில் 455 மாணவர்களுக்கு பட்டங்களை வழங்கினார்.
விழாவில், ஸ்ரீராமச்சந்திரா உயர் கல்வி மற்றும் ஆராய்ச்சி நிறுவனத்தின் வேந்தர் வி.ஆர்.வெங்கடாசலம், இணைவேந்தர் ஆர்.வி.செங்குட்டுவன், மருத்துவ கல்லூரி தலைவர் மருத்துவர் கே.பாலாஜி சிங், பதிவாளர் மருத்துவர் எஸ்.செந்தில் குமார், ஆய்வுத் துறை தலைவர் மருத்துவர் பி. வெங்கடாசலம், தேர்வுகள் கண்காணிப்பாளர் மருத்துவர் ஆர்.பத்மாவதி, நிதித்துறை இயக்குனர் ஜே.ரவிசங்கர் உள்ளிட்டோர் கலந்து கொண்டனர்.
விழாவில், இஸ்ரோ தலைவர் வி.நாராயணன் பேசியதாவது: “உலகளாவிய விண்வெளி வணிகத்தில், இந்தியாவின் வருவாயை 10 சதவீதம் அளவுக்கு உயர்த்த இலக்கு நிர்ணயிக்கப்பட்டுள்ளது. இந்தியாவின் வரலாற்று சிறப்புமிக்க மனித விண்வெளி பயண திட்டமான ககன்யான் திட்டத்துக்கான பணிகள் தீவிரமாக நடைபெற்று வருகின்றன. ஆண்டுக்கு 50 ராக்கெட்டுகளை ஏவும் இலக்கை இந்தியா அடைவதற்கு, ஏவுதள உள்கட்டமைப்பு மற்றும் ராக்கெட் தயாரிக்கும் தொழில்நுட்பம் ஆகியவற்றில் தனியார் பங்களிப்புடன் விண்வெளித்துறையை பலப்படுத்த முடியும். தமிழகத்தில் புதிய ஏவுதள உள்கட்டமைப்பு குலசேகரபட்டினத்தில் தயாராகி வருகிறது.
