தாம்பரம்: தாம்பரம் மாநகராட்சி, மண்டலம் 3-க்கு உட்பட்ட பல்வேறு பகுதிகளில் கடந்த ஆண்டுகளைவிட இந்த ஆண்டு குடிநீர் தட்டுப்பாடு அதிகமாக இருப்பதாக பொதுமக்கள் தெரிவிக்கின்றனர்.
குறிப்பாக வார்டு 41 மற்றும் அதைச் சுற்றியுள்ள குடியிருப்புப் பகுதிகளில் முறையான குடிநீர் விநியோகம் இல்லாததால் பொதுமக்கள் அத்தியாவசிய தேவைகளுக்காக தண்ணீரைத் தேடி அலையும் நிலை ஏற்பட்டுள்ளதாகக் கூறப்படுகிறது. பருவமழைக் காலத்தை கருத்தில் கொண்டு குடிநீர் தட்டுப்பாட்டை சமாளிப்பதற்கான முன்னெச்சரிக்கை நடவடிக்கைகள் மண்டலம் 3 பகுதியில் போதிய அளவில் மேற்கொள்ளப்படவில்லை என பொதுமக்கள் குற்றம்சாட்டுகின்றனர்.
குடிநீர் தட்டுப்பாடு ஏற்படும் பகுதிகளை முன்கூட்டியே கண்டறிந்து மாற்று ஏற்பாடுகளைச் செய்திருக்க வேண்டும் என்றும் அவர்கள் தெரிவித்துள்ளனர். செம்பாக்கம் பகுதியில் உள்ள வார்டுகளுக்கு தாம்பரம் மாநகராட்சி சார்பில் லாரிகள் மூலம் குடிநீர் வழங்கப்படும் நிலையில், வார்டு 41 உள்ளிட்ட தட்டுப்பாடு நிலவும் பகுதிகளுக்கு இதுவரை போதிய அளவில் குடிநீர் வழங்கப்படவில்லை என்றும் பொதுமக்கள் கூறுகின்றனர்.
எனவே குடிநீர் தட்டுப்பாடு நிலவும் பகுதிகளில் உடனடியாக லாரிகள் மூலம் குடிநீர் விநியோகம் செய்ய வேண்டும். மேலும், தேவையான இடங்களில் ஆழ்துளைக் கிணறுகள் அமைத்து மாற்று குடிநீர் ஆதாரங்களை ஏற்படுத்த வேண்டும். பொது மக்களின் அத்தியாவசியத் தேவையை கருத்தில் கொண்டு, குடிநீர் தட்டுப்பாட்டை விரைந்து தீர்க்க மாநகராட்சி அதிகாரிகள் நடவடிக்கை எடுக்க பொதுமக்கள் மற்றும் நலச்சங்கங்கள் சார்பில் கோரிக்கை விடுக்கப்பட்டு உள்ளது.
