சென்னை: அரும்பாக்கம் பள்ளிவாசல் சம்பவத்தில் இந்து அமைப்புகள் மீது அவதூறு பரப்பி மத மோதலைத் தூண்ட முயற்சி நடப்பதாக டிஜிபி அலுவலகத்தில் இந்து முன்னணி புகார் அளித்துள்ளது.
இதுகுறித்து இந்து முன்னணி மாநில செய்தித் தொடர்பாளர் இளங்கோவன் சென்னை டிஜிபி அலுவலகத்தில் அளித்துள்ள புகார் மனுவில் கூறியிருப்பதாவது: கடந்த 2 நாட்களுக்கு முன்பு அரும்பாக்கத்தில் உள்ள பள்ளிவாசலில் மனநலம் பாதிக்கப்பட்ட நபரால் நிகழ்ந்த அசம்பாவிதச் சம்பவம் நடந்தது.
இச்சம்பவத்தில் ஈடுபட்டதாகக் கூறப்படும் சித்தார்த் என்பவர், கடந்த பல ஆண்டுகளாகத் தீவிர மனநல சிகிச்சை பெற்று வரும் மாற்றுத்திறனாளி. அவர் தீவிர மனநலப் பாதிப்பால் பள்ளிவாசல் சென்றதாகக் கூறப்படும் நிலையில், அங்கிருந்த சிலர் அவரை மிகக் கொடூரமாகத் தாக்கியுள்ளனர்.
மேலும், மனநலம் பாதிக்கப்பட்ட ஒருவரை இப்படித் தாக்கலாமா எனக் கேட்டு, அவரை மீட்கச் சென்ற அவரது குடும்ப உறவினரையும் விடாமல் தாக்கியுள்ளனர். இதில் படுகாயமடைந்த அவர், மருத்துவமனையில் உள்நோயாளியாக அனுமதிக்கப்பட்டு, தீவிர சிகிச்சைப் பிரிவில் உள்ளார்.
இந்தச் சம்பவத்தை, திட்டமிட்டு ஆர்.எஸ்.எஸ். மற்றும் இந்து அமைப்புகள் மீது திசைதிருப்பி, பொய்யான தகவல்களைப் பரப்பி மத மோதலை உருவாக்கச் சிலர் முயற்சிக்கின்றனர்.
ஏற்கெனவே மற்றொரு பள்ளிவாசலில் தகராறில் ஈடுபட்ட நபர், தன்னை ஒரு குறிப்பிட்ட அரசியல் கட்சியின் உறுப்பினர் எனக் கூறியபோதும், அந்தச் சம்பவத்தை இந்து அமைப்புகள் மீது திசைதிருப்ப முயற்சி நடைபெற்றது.
தற்போதைய சம்பவத்திலும் அதே பாணியில் அவதூறு பரப்பி, வன்முறையைத் தூண்டும் நோக்கில் சிலர் செயல்படுகின்றனர். எனவே, மனநலம் பாதிக்கப்பட்ட மாற்றுத்திறனாளி மற்றும் அவரது உறவினர் மீது தாக்குதல் நடத்திய நபர்கள் மீது வழக்குப் பதிவு செய்து அவர்களைக் கைது செய்ய வேண்டும்.
மேலும், இந்தச் சம்பவத்தைப் பயன்படுத்தி வன்முறையைத் தூண்டவும், இந்து அமைப்புகள் மீது திட்டமிட்டு அவதூறு பரப்பி சமூக அமைதியைக் குலைக்கவும் முயற்சிப்போரின் பின்னணி குறித்து விசாரணை நடத்தி உரிய நடவடிக்கை எடுக்க வேண்டும். இவ்வாறு அதில் கூறப்பட்டுள்ளது.
