சென்னை: இம்மாதத்தில் 3 மாவட்டங்களில் அரசு நிகழ்ச்சிகளில் கலந்து கொண்டு நலத்திட்ட உதவிகளை வழங்கவுள்ள முதல்வரின் அரசு முறைப் பயணம் இடைத்தேர்தலுக்கு அச்சாரமாக அமைந்துள்ளதாக பேச்சு எழுந்துள்ளது.
தமிழகத்தில் தவெக அரசு அமைந்ததைத் தொடர்ந்து அண்மையில் நடந்து முடிந்த தாராபுரம் மற்றும் மதுராந்தகம் ஆகிய தொகுதிகளுக்கான இடைத்தேர்தல் வெற்றியை பதிவு செய்தது. இதைத் தொடர்ந்து, விராலிமலை, பெருந்துறை, அம்பாசமுத்திரம், திருச்சி கிழக்கு மற்றும் கரூர் ஆகிய 5 தொகுதிகளில் எப்போது வேண்டுமானாலும் இடைத்தேர்தல் அறிவிக்கப்படும் சூழலில், தவெகவின் பலத்தை பெரும்பான்மை எண்ணிக்கைக்கு மிக அருகில் கொண்டு செல்ல முதல்வர் விஜய் பல்வேறு வியூகங்களை வகுத்து வருகிறார்.
இந்த அரசியல் பின்னணியில்தான், அரசு நலத்திட்டங்கள் மற்றும் திறப்பு விழாக்கள் மூலமாக மக்களை நேரடியாகச் சென்றடைய அவர் புதுக்கோட்டை, ஈரோடு மற்றும் அம்பாசமுத்திரம் செல்ல திட்டமிட்டிருப்பதாக தகவல்கள் வெளியாகி உள்ளன.
நாளை சென்னையில் இருந்து விமானம் மூலம் புதுக்கோட்டை செல்லும் முதல்வர் விஜய் அங்கு புதிய பேருந்து நிலையம், உள்விளையாட்டு அரங்கத்தை திறந்து வைப்பதுடன், ரூ.100 கோடி மதிப்பில் 14 ஆயிரம் பயனாளிகளுக்கு நலத்திட்ட உதவிகளை வழங்க உள்ளார். இந்நிகழ்ச்சிகளை முடித்து 1.5 கி.மீ. தொலைவுக்கு ரோடுஷோவாக சென்று பொதுமக்களை சந்திக்கும் நிகழ்வுக்கும் ஏற்பாடு செய்யப்பட்டுள்ளது.
இதைத்தொடர்ந்து நாளை மறுநாள் ஈரோடு மாவட்டம் பெருந்துறை செல்லும் முதல்வர் விஜய் அங்குள்ள ஒரு தனியார் கல்லூரியில் நடைபெறவிருக்கும் அரசு விழாவில் பங்கேற்று மகளிர் சுய உதவிக் குழுக்களை சேர்ந்த பெண்களுக்கு ரூ.1,110 கோடியில் நலத்திட்ட உதவிகளை வழங்க உள்ளதாக அமைச்சர் விஜய் பாலாஜி தெரிவித்துள்ளார்.
அதன்பின், நவ.14-ம் தேதி குழந்தைகள் தினத்தையொட்டி நெல்லை மாவட்டம் அம்பாசமுத்திரம் அகஸ்தியர்பட்டி பகுதியில் உள்ள அரசுப் பள்ளி ஒன்றில் முதல்வர் கலந்து கொண்டு பள்ளி மாணவர்களுக்கு கேக் வழங்கி கொண்டாட உள்ளார். அதைத் தொடர்ந்து, திருச்சி கிழக்கு, கரூரிலும் அரசு நிகழ்ச்சிகளில் பங்கேற்பார் என தவெக தரப்பில் கூறப்படுகிறது.
அரசியல் ரீதியாகப் பார்க்கும்போது, இந்தப் பயணங்கள் வெறும் அரசு விழாக்கள் மட்டுமன்றி, காலியாக உள்ள 5 சட்டப்பேரவை தொகுதிகளுக்கான இடைத்தேர்தல் பிரச்சாரத்துக்கு அச்சாரமாக அமைந்துள்ளதாக கூறப்படுகிறது. மேலும், இந்த 5 தொகுதிகளிலும் தங்களது வாக்குவங்கியை அடிமட்ட அளவில் பலப்படுத்துவதற்கான முக்கிய நகர்வாகவே கருதப்படுகிறது.
