முதல்வர் விஜய்
நெல்லை: அம்பாசமுத்திரத்தில் நவம்பர் 14-ம் தேதி நடைபெறும் குழந்தைகள் தின விழாவில் முதல்வர் விஜய் பங்கேற்பார் என்று தகவல் வெளியாகி உள்ளது.
திருநெல்வேலி மாவட்டம், அம்பாசமுத்திரம் தொகுதியில் போட்டியிட்ட அதிமுக வேட்பாளர் இசக்கி சுப்பையா உட்பட அக்கட்சி எம்எல்ஏக்கள் 6 பேர் தங்களது எம்எல்ஏ பதவியை ராஜினாமா செய்துவிட்டு, தவெகவில் இணைந்தனர். இதில், தாராபுரம், மதுராந்தகம் ஆகிய 2 தொகுதிகளுக்கு சமீபத்தில் இடைத்தேர்தல் நடைபெற்றது. எம்எல்ஏ பதவியை ராஜினாமா செய்துவிட்டு, தவெகவில் போட்டியிட்ட சத்தியபாமா, மரகதம் குமரவேல் ஆகிய இருவரும் வெற்றி பெற்றனர்.
முதல்வர் விஜய் தான் போட்டியிட்டு வெற்றிபெற்ற திருச்சி கிழக்கு தொகுதி எம்எல்ஏ பதவியை ராஜினாமா செய்ததால், அத்தொகுதி உட்பட 5 தொகுதிகளுக்கு நீதிமன்றத்தில் வழக்கு காரணமாக இடைத்தேர்தல் நடைபெறவில்லை. இந்நிலையில், வழக்கு முடிவுக்கு வந்துள்ளதால் விரைவில் 5 தொகுதிகளுக்கும் இடைத்தேர்தல் அறிவிக்கப்படலாம் என்ற எதிர்பார்ப்பு ஏற்பட்டுள்ளது.
அம்பாசமுத்திரம் தொகுதி வேட்பாளராக தான் போட்டியிடுவதாக நாம் தமிழர் கட்சி தலைமை ஒருங்கிணைப்பாளர் சீமான் அறிவித்துள்ளார். எதிர்க்கட்சிகள் சார்பில் சீமான் பொதுவேட்பாளராக அறிவிக்கப்படுவாரா என்ற எதிர்பார்ப்பும் ஏற்பட்டுள்ளது. இது குறித்த கேள்விக்கு பதிலளித்த திமுக தலைவர் மு.க.ஸ்டாலின், தேர்தல் தேதி அறிவித்த பிறகு அதைப்பற்றி பேசலாம் என்றார்.
இடைத்தேர்தல் நடைபெற உள்ள 5 தொகுதிகளிலும் ஆளுங்கட்சியான தவெகவும் தீவிர கவனம் செலுத்தி வருகிறது. அந்த தொகுதிகளில் முதல்வர் விஜய் பங்கேற்கும் நிகழ்ச்சிகள் அடுத்தடுத்து நடைபெற உள்ளதாக கூறப்படுகிறது.
அம்பாசமுத்திரம் அரசுப் பள்ளியில் நவம்பர் 14-ம் தேதி நடைபெறும் குழந்தைகள் தின விழாவில் முதல்வர் விஜய் பங்கேற்க இருப்பதாகவும், அந்த விழாவில் மாணவ, மாணவிகளுக்கு கேக் வழங்கும் திட்டத்தை தொடங்கி வைக்க இருப்பதாகவும் தகவல் வெளியாகி உள்ளது.
அம்பாசமுத்திரம் பகுதியில் திருநெல்வேலி மாவட்ட ஆட்சியர் ஆனந்த் மோகன் சமீபத்தில் ஆய்வு செய்தார். அங்கு முதல்வர் பங்கேற்கும் நிகழ்ச்சிகள் குறித்த விவரம் விரைவில் அதிகாரபூர்வமாக வெளியாகும் என்று கூறப்படுகிறது. இதனால் இடைத்தேர்தல் களம் சூடுபிடிக்க தொடங்கியுள்ளது.
