பிரதிநிதித்துவப் படம்
புதுடெல்லி: மும்பையில், 4 ஆண்டுகளுக்கு முன் இறந்த 80 வயது முதியவரின் உடல் ஃப்ரீசரில் பதப்படுத்தி வைக்கப்பட்டிருந்தது தெரியவந்துள்ளது.
இறந்தவரை உயிர்ப்பிக்கும் தொழில்நுட்பம் வரும் என நம்பி, அவரது குடும்பத்தினர் காத்திருந்தனர். தகவல் கிடைத்ததும் குரார் காவல் துறையினர் சம்பவ இடத்துக்குச் சென்று உடலைக் கைப்பற்றினர்.
அப்போது உடலை அமெரிக்காவில் உள்ள ‘கிரையோனிக்ஸ்’ மையத்துக்கு அனுப்பும் ஏற்பாடுகள் நடந்து கொண்டிருந்தன.
அங்கு இறந்தவர்களை உயிர்ப்பிக்கும் ஆய்வு நடைபெறுவதாகக் கூறப்படுகிறது. விசாரணையில், முதியவர் 2022-ல் புற்றுநோய், சிறுநீரகச் செயலிழப்பு உள்ளிட்ட நோய்களால் இயற்கையாக உயிரிழந்தது தெரியவந்தது. அவரது மரணத்தை ஏற்க முடியாத குடும்பத்தினர், இறுதிச் சடங்குகளைச் செய்யவில்லை.
வீட்டில் ஒரு ஃப்ரீசரில் உடலை வைத்திருந்த அவர்கள், பின்னர் மலாட்டில் உள்ள பகல்நேரப் பராமரிப்பு மையத்தின் ஃப்ரீசருக்கு மாற்றி, மாத வாடகையும் செலுத்தி வந்தனர். இதற்காக லட்சக்கணக்கான ரூபாய் செலவிட்டுள்ளனர்.
புதுப்பிப்புப் பணிகளுக்காக அந்த மையம் ஒரு மாதம் மூடப்பட்டபோது, உடல் இருப்பது வெளியே தெரிந்து போலீஸாருக்குத் தகவல் அளிக்கப்பட்டது. காவல் துறையினர் குடும்பத்தினருக்கு ஆலோசனை வழங்கிய பின், நேற்று முன்தினம் உடல் தகனம் செய்யப்பட்டது.
ஒருவர் இறந்ததாக அறிவிக்கப்பட்ட பின், அவரது உடலிலிருந்து ரத்தம் அகற்றப்பட்டு, சிறப்பு வேதிப்பொருட்கள் செலுத்தப்படுகின்றன. பின்னர் உடல் அல்லது தலை -196 டிகிரி செல்சியஸில் திரவ நைட்ரஜனில் சேமிக்கப்படுகிறது.
எதிர்காலத்தில் இவர்களை உயிர்ப்பிக்க முடியும் என இம்மையங்கள் நம்புகின்றன. அமெரிக்காவின் அல்கோர் லைஃப் எக்ஸ்டென்ஷன் ஃபவுண்டேஷன், கிரையோனிக்ஸ் இன்ஸ்டிடியூட் ஆகியவை இத்துறையின் முக்கிய அமைப்புகள்.
ஆனால், முக்கிய அறிவியல் சமூகம் இதைப் பரிசோதனை முயற்சி, போலி அறிவியல் என்று கருதுகிறது. தற்போதைய தொழில்நுட்பத்தால் உறைந்த திசுக்களை மீண்டும் உயிர்ப்பிப்பது சாத்தியமில்லை என்பதே அவர்களின் கருத்து.
