சென்னை: தமிழகத்தில் வீடுகள் மற்றும் வணிக நிறுவனங்களில் புதிய ஸ்மார்ட் மீட்டர்களைப் பொருத்தும் பணிகளை மின்வாரியம் தீவிரப்படுத்தியுள்ளது. இதன்படி, தமிழகத்தில் உள்ள 45 மின் பகிர்மான வட்டங்களிலும் 8 பணியாளர்கள் வீதம் வயர்மேன் கிரேடு-2 அல்லது எலக்ட்ரிஷியன் கிரேடு-2 ஆகிய பணியிடங்களில் கூடுதல் ஊழியர்கள் தற்காலிகமாக நியமிக்கப்பட உள்ளனர்.
ஒப்பந்த அடிப்படையில் அவுட்சோர்சிங் முறையில் நியமிக்கப்படும் இவர்களின் பணிக்காலம் 60 நாட்களாகும். நாளொன்றுக்கு ரூ.965 ஊதியம் வழங்கப்படும். இதற்கான டெண்டர் கோரும் பணிகளை மேற்கொள்ள அறிவுறுத்தப்பட்டுள்ளது. இவர்கள் பழைய மீட்டர்களை அகற்றி புதிய ஸ்மார்ட் மீட்டர்களைப் பொருத்தும் பணிகளில் ஈடுபடுத்தப்படுவர். தடையற்ற மின் விநியோகத்தை உறுதி செய்யவும் இவர்கள் நியமிக்கப்படுவதாக அதிகாரிகள் தெரிவித்துள்ளனர்.
