ஆயுதபூஜை முன்னிட்டு கோவையில் ஒரு கிலோ செவ்வந்திப் பூ ரூ.600

ஆயுத பூஜையையொட்டி கோவை மார்க்கெட்டில் பூ, பொரி மற்றும் அலங்காரப் பொருட்கள் விற்பனை அமோகமாக நடைபெற்றன.

கோவை மார்க்கெட்டில் பொரி ஒரு படி ரூ.10-க்கு விற்பனை செய்யப்பட்டது. கடந்த சில நாட்களுக்கு முன்பு ஒரு கிலோ ரூ.300-க்கு விற்பனை செய்யப்பட்ட மல்லிகைப் பூ, நேற்று ரூ.1,000-க்கு விற்பனை செய்யப்பட்டது.

இதுதொடர்பாக மார்க்கெட் வியாபாரிகள் கூறும்போது, ‘‘கடந்த சில தினங்களுக்கு முன் ஜாதிமல்லி ஒரு கிலோ ரூ. 300-க்கு விற்பனை செய்யப்பட்ட நிலையில், தற்போது ரூ.600-க்கு விற்பனை செய்யப்படுகிறது. பொதுவாக சரஸ்வதிபூஜை, ஆயுதபூஜை விழாவின்போது செவ்வந்தி பூக்களுக்கு அதிக வரவேற்பு இருக்கும்.

இந்த ஆண்டு வரலாறு காணாத விலையாக ஒரு கிலோ செவ்வந்தி பூ ரூ.600-க்கு விற்பனை செய்யப்படுகிறது. ரோஜா ஒரு கிலோ ரூ.320-லிருந்து ரூ.400-ஆக உயர்ந்துள்ளது. பனை ஓலை ஒன்று ரூ.5, வாழை குலை ஒன்று ரூ. 20-க்கு விற்பனை செய்யப்படுகிறது.

ஆயுதபூஜை தினத்தன்று வீடு, அலுவலகம் மற்றும் தொழில் நிறுவனங்களில் அலங்காரம் செய்யப்படுவது வழக்கம். இதனால் கோவை மார்க்கெட்டில் அலங்காரப் பொருட்கள் விற்னையும் அதிகரித்துள்ளது, என்றனர்.