முதல்வர் ஜெயலலிதாவுக்கு லண்டன் மருத்துவர் ஆலோசனைப்படி சிகிச்சை

முதல்வர் ஜெயலலிதா உடல்நிலை குறித்த வதந்திகள் பரவிக்கொண்டே இருக்கும் சூழலில், அவருக்கு லண்டன் மருத்துவரின் ஆலோசனைப்படி சிகிச்சை வழங்கப்படுகிறது எனத் தெரியவந்துள்ளது.

லண்டன் பிரிட்ஜ் மருத்துவமனையின் தீவிர சிகிச்சைப் பிரிவு நிபுணர் டாக்டர் ரிச்சர்ட் ஜான் பீல், அப்போலோ மருத்துவமனையில் முதல்வருக்கு சிகிச்சை அளித்துவரும் மருத்துவக் குழுவுக்கு ஆலோசனை வழங்கி வருகிறார்.

முதல்வரின் உடல்நிலையை பரிசோதித்த டாக்டர்.பீல், அவருக்கு அப்போலோ மருத்துவர்கள் சிறப்பான மருத்துவ சிகிச்சை வழங்கி வருகின்றனர் என்றார்.

சர்வதேச அளவில் பெயர் பெற்ற மருத்துவரும், ஆராய்ச்சியாளருமான டாக்டர் பீல் அடுத்த இரண்டு நாட்களுக்கு சென்னையில் தங்கி அப்போலோ மருத்துவமனையில் முதல்வருக்கு சிகிச்சை அளித்துவரும் மருத்துவக் குழுவுக்கு தேவையான ஆலோசனைகளை வழங்குவார் எனத் தெரிகிறது.

முன்னதாக, திமுக தலைவர் கருணாநிதி வெள்ளிக்கிழமை வெளியிட்ட அறிக்கையில், வதந்திகளுக்கு முற்றுப்புள்ளி வைக்கின்ற வகையிலாவது, சிகிச்சை பெற்றுவரும் முதல்வரின் புகைப்படத்தை அரசு நிர்வாகம் வெளியிட வேண்டும் என வலியுறுத்தியிருந்தார் என்பது குறிப்பிடத்தக்கது.