தொலைத்தொடர்பு கருவிகள், ஏவுகணைகளுடன் நவீன தொழில்நுட்பத்தில் ‘ஐஎன்எஸ் விசாகப்பட்டினம்’ போர்க் கப்பல்: சர்வதேச தரத்துக்கு இணையாக உள்நாட்டில் வடிவமைப்பு

தமிழர்கள் கட்டிய பெரிய நாவாய்கள் புலி, மீன், வில் முதலிய சின்னங்கள் பொறிக்கப்பட்ட கொடிகளோடு ஆழ்கடல் அனைத்தையும் தாண்டி வந்தன. அவர்கள் திசைகாட்டும் கருவியையும் மணிகாட்டும் கருவியையும் வைத்திருந்தனர்.

நம் பரதவர்களே இன்றைய கப்பல் கட்டும்தொழிலுக்கு முன்னோடிகள். பல்லாண்டுகளாய் பலபடசிந்தித்துப் பயின்று மரம், கட்டுமரம், மிதவை, தெப்பம் போன்றவற்றைச் செய்து நீரைக் கடக்க வழி கண்டனர்.

மற்ற நாட்டவர் செய்யாத முறையில் ஒன்றின்மீதுஒன்றாக மூன்றடுக்கு மரங்களை இணைத்துக் கப்பல் கட்டினர் தமிழ்நாட்டுக் கப்பற் கலை நிபுணர்கள். இரும்பு ஆணிகளைக் கொண்டு அறைந்தால்கடல் நீரால் துருவேறி கப்பலில் துவாரம் விழுந்துவிடும் என்பதால் அவற்றைப் பயன்படுத்தாமலேயே கப்பல் கட்டினார்கள்.

சிறந்த மாலுமியான இத்தாலியைச் சேர்ந்த மார்கோபோலோ 13-ம் நூற்றாண்டையடுத்து இந்தியாவுக்குக் கப்பலில் வந்தார். தமிழ்நாட்டுக் கப்பல்கள் குறித்து, “தமிழ்நாட்டுக் கப்பல்கள் தேவதாரு மரத்தால் கட்டப்பட்டவை. அடிப்பகுதியில் சுண்ணாம்பும் சணலும் கலந்து அரைத்து, எண்ணெய் சேர்த்து நெய்போலாக்கிப் பூசிவிடுகிறார்கள். அது நன்றாக ஒட்டி பசைத்தன்மையைப் பாதுகாக்கிறது” என்று வியந்து பாராட்டியுள்ளார்.

“பிரிட்டிஷ்காரர்கள் கட்டிய கப்பலை 12 ஆண்டுகளுக்கு ஒரு முறை மராமத்து செய்தே தீர வேண்டும். ஆனால், தமிழர்கள் கட்டிய கப்பல்கள் 50 ஆண்டுகளானாலும் பழுது பார்க்கும் அவசியம் இல்லை” என்று லெப்டினென்ட் வாக்கர் என்கிற ஆங்கிலேயர் 1811-ல் கூறியுள்ளார்.

தமிழ்நாட்டு மீனவர்கள் மிகத் தொன்மையான காலத்திலேயே வானியல், நீரியல் அறிவில் சிறந்துவிளங்கினர். கடலின் நீரோட்டங்களையும், மீன்கள் எழுப்பும் ஒலிகளையும், கடற்பறவைகளின் போக்கையும்,கடல் நீரின் தட்பவெப்ப நிலையையும், வின்மீண்களின் நிலையையும் கொண்டு காற்று, மழை, புயல் போன்றவற்றைக் கணித்தனர்.

வணிகர்கள் பயன்படுத்த சரக்கேற்றும் கப்பல்கள், மக்களுக்காக பிரயாணக் கப்பல்கள், மன்னர்கள் செல்ல அலங்காரக் கலங்கள் என்று பல்வேறு விதமான கப்பல்களைத் தமிழர்கள் வடிவமைத்தனர்.

- சாத்தான்குளம் அ.ராகவன் எழுதிய‘நம் நாட்டுக் கப்பற் கலை’ நூலில் இருந்து.

இந்நூலுக்கு அப்போதைய பொதுப்பணி - போக்குவரத்துத் துறை அமைச்சர் மு.கருணாநிதி எழுதிய முன்னுரையில் ‘வங்கம், நாவாய், அம்பி, தோணி, புணை போன்ற நீரைக் கடக்கும் சாதனங்களும் அவற்றை ஓட்டும் மீகாமன் என்னும் மாலுமிகளும் நள்ளிரவிலும் ஆழ்கடலிலும் கரைகளை அறிந்து ஓட்டுவதற்கென்றே கட்டப்பட்ட கலங்கரைவிளக்கங்களும் பழங்காலத்திலேயே தமிழகத்தில் இருந்த உண்மையை மறுப்பார் இல்லை” என்று குறிப்பிட்டுள்ளார்.