Published : 22 Sep 2020 12:54 pm

Updated : 22 Sep 2020 12:54 pm

 

Published : 22 Sep 2020 12:54 PM
Last Updated : 22 Sep 2020 12:54 PM

இந்தி தெரியாததால் வங்கிக் கடன் வழங்க மறுப்பு எனப் புகார்; தமிழர் உணர்வுடன் விளையாடாதீர்கள்: ஸ்டாலின் கண்டனம்

mk-stalin-condemns-hindi-imposition
ஸ்டாலின்: கோப்புப்படம்

சென்னை

அரியலூர் மாவட்டத்தில் மொழிப் பிரச்சினையைப் பேசி, ஓய்வுபெற்ற அரசு மருத்துவருக்கு வங்கிக் கடன் வழங்க மறுத்த சம்பவத்திற்கு திமுக தலைவர் மு.க.ஸ்டாலின் கண்டனம் தெரிவித்துள்ளார்.

தமிழகத்தின் பல்வேறு அரசு மருத்துவமனைகளில் பணியாற்றி, கடைசியாக அரியலூர் மாவட்டம் ஜெயங்கொண்டத்தில் தலைமை மருத்துவராகப் பணியாற்றி ஓய்வு பெற்றவர் பாலசுப்பிரமணியன். இவர் தனக்குச் சொந்தமான இடத்தில் வீடு கட்டுவதற்காக, கங்கைகொண்ட சோழபுரத்தில் உள்ள இந்தியன் ஓவர்சீஸ் வங்கிக்கு வங்கிக் கடன் கேட்டுச் சென்றுள்ளார்.

அப்போது, வங்கியின் கிளை மேலாளரிடம் பாலசுப்பிரமணியன் பேசியுள்ளார். அப்போது, "உனக்கு இந்தி தெரியுமா?" என வடமாநிலத்தைச் சேர்ந்த அந்த வங்கி மேலாளர் கேட்டுள்ளார். அதற்கு தனக்கு ஆங்கிலம் தெரியும் எனக் கூறியதால், பாலசுப்பிரமணியத்திற்கு வங்கிக் கடன் வழங்க வங்கி மேலாளர் மறுத்துவிட்டதாகப் புகார் எழுந்துள்ளது.

உரிய ஆவணங்களைச் சமர்ப்பித்தும், எந்த ஆவணங்களையும் பார்க்காமல் இந்தி மொழியைப் பற்றி மட்டுமே பேசி, வங்கிக் கடன் வழங்க மறுத்ததாக பாலசுப்பிரமணியன் குற்றம் சாட்டியுள்ளார்.

இச்சம்பவத்திற்கு பல்வேறு அரசியல் கட்சித் தலைவர்கள் கண்டனம் தெரிவித்து வருகின்றனர்.

இது தொடர்பாக, திமுக தலைவரும் சட்டப்பேரவை எதிர்க்கட்சித் தலைவருமான மு.க.ஸ்டாலின் இன்று (செப். 22), தனது முகநூல் பக்கத்தில் பதிவிட்டுள்ளதாவது:

"ஜெயங்கொண்டத்தில் வாழும் ஓய்வுபெற்ற மருத்துவர் பாலசுப்பிரமணியன் உரிய ஆவணங்களுடன் கடன் கேட்டுச் சென்றபோது, 'இந்தி தெரியாத உங்களுக்குக் கடன் தரமுடியாது' என்று ஆணவத்துடன் கூறியிருக்கிறார், இந்தியன் ஓவர்சீஸ் வங்கியில் பணியாற்றும் வட இந்திய அதிகாரி!

இந்தி மொழி வெறி எண்ணெய் ஊற்றி வளர்த்தெடுக்கப்பட்டு வருகிறது. தமிழ்நாட்டுக்கு வேலை பார்க்க வந்த ஒருவருக்கு இவ்வளவு ஆணவமா? பாஜக அரசின் பின்புலம் இதற்குக் காரணமா?

எதுவாக இருந்தாலும் தமிழர் உணர்வுடன் விளையாடாதீர்கள்! சிறு பொறிகள் தீப்பிழம்பாக மாறிவிடும் பேரபாயம் உண்டு; எச்சரிக்கை!".

இவ்வாறு ஸ்டாலின் தெரிவித்துள்ளார்.


தவறவிடாதீர்!

மு.க.ஸ்டாலின்திமுகஇந்தி திணிப்புவங்கி மேலாளர்பாலசுப்பிரமணியன்MK stalinDMKHindi impositionBank managerBalasubramanianONE MINUTE NEWS

Sign up to receive our newsletter in your inbox every day!

You May Like

More From This Category

More From this Author