Published : 31 Aug 2015 10:04 AM
Last Updated : 31 Aug 2015 10:04 AM

கோஷ்டி மோதலில் வீடுகள் சூறை - 9 பேர் கைது

பெசன்ட் நகரில் கோஷ்டி மோதலில் வீடுகளை சூறையாடியதாக 9 பேர் கைது செய்யப்பட்டனர். சென்னை பெசன்ட் நகர் கடற்கரைக்குப்பம் பகுதியில் ஓடைமாநகர், ஓடைக்குப்பம் என இரு கடற்கரை கிராமங்கள் உள்ளன. இரு கிராமங்களிலும் உள்ள 2 கோஷ்டியினரிடையே பல ஆண்டுகளாக முன்விரோதம் இருந்து வருகிறது. இந்நிலையில் பெசன்ட் நகர் வேளாங்கண்ணி மாதா ஆலயத்தில் திருவிழா நடைபெறும் நேரத்தில் ஊர் சார்பாக செய்ய வேண்டிய வழக்கமான முறைகளை முன்னின்று நடத்துவது யார்? என்பதில் 2 கோஷ்டிகளுக்கு இடையே மீண்டும் மோதல் ஏற்பட்டது.

இந்நிலையில் ஓடைமாநகரை சேர்ந்த சிலர் நேற்று முன்தினம் இரவில் ஓடைக்குப்பத்தில் உள்ள வீடுகளுக்குள் புகுந்து சூறையாடினர். இதைத் தடுக்க முயன்ற ஆண்கள், பெண்கள் என அனைவரையும் அடித்தனர். இதில் 10-க்கும் மேற்பட்டவர்கள் படுகாயம் அடைந்தனர்.

விசாரணையில் ஓடைமா நகரை சேர்ந்த வீரன் என்பவர் தலைமையில் வந்தவர்கள்தான் தாக்குதல் நடத்தியது தெரிந்தது. எனவே வீரன் உட்பட 25 பேர் மீது வழக்குப்பதிவு செய்தனர். பின்னர் நேற்று காலையில்மணிவண்ணன், தினேஷ், தர்மலிங்கம், கிருஷ்ணன், ரகு, பஞ்சநாதன் உட்பட 9 பேரை கைது செய்தனர். மேலும் வீரன், குமரன், குகா, பழனி உட்பட 16 பேரை தேடி வருகின்றனர்.

வீரன் மீது திருவான்மியூர் காவல் நிலையத்தில் அடிதடி மற்றும் ஆள் கடத்தல் வழக்குகள் நிலுவையில் இருப்பதாக போலீஸார் தெரிவித்துள்ளனர். மோதல் சம்பவத்தை தொடர்ந்து பலத்த போலீஸ் பாதுகாப்பு போடப்பட்டுள்ளது.

FOLLOW US

Sign up to receive our newsletter in your inbox every day!

WRITE A COMMENT
 
x