Published : 31 Dec 2017 11:08 am

Updated : 31 Dec 2017 11:08 am

 

Published : 31 Dec 2017 11:08 AM
Last Updated : 31 Dec 2017 11:08 AM

பாஜகவுடன் கூட்டணி இல்லை என முதல்வர் கூறுவது மக்களை திசை திருப்பும் செயல்: திமுக செயல் தலைவர் ஸ்டாலின் குற்றச்சாட்டு

ஆர்.கே.நகர் இடைத்தேர்தலில் தோல்வியடைந்த பிறகு, பாஜகவுடன் கூட்டணி இல்லை என முதல்வர் கே.பழனிசாமி கூறியிருப்பது மக்களை திசை திருப்பும் செயல் என திமுக செயல் தலைவர் மு.க.ஸ்டாலின் தெரிவித்துள்ளார்.

இது தொடர்பாக அவர் நேற்று வெளியிட்டுள்ள அறிக்கையில் கூறியிருப்பதாவது:


ஆர்.கே.நகர் இடைத்தேர்தலில் தோல்வியடைந்த அதிமுக, திடீர் ஞானோதயம் வந்ததைப் போல வேதாந்தம் என நினைத்து உண்மைக்கு மாறானதை ஓதுகிறது. பாஜகவின் கிளைக்கட்சி போல அவர்களின் ஆணைகேட்டு கொத்தடிமையாக அதிமுக செயல்பட்டு வருவதை நாடே நன்கு அறியும். சட்டப்பேரவையில் பெரும்பான்மை எம்எல்ஏக்கள் இல்லாத இந்த ஆட்சி இன்னமும் நீடிப்பதற்கும், ஊழல் - கொள்ளையைத் தொடர்வதற்கும் பாஜகவுடனான கூட்டணிதான் காரணம் என்பது தமிழக மக்களுக்குத் தெரியும்.

இடைத்தேர்தல் தோல்விக்குப் பிறகு, கூட்டணி குறித்து என்ன காரணத்தினாலோ பொதுமேடைகளில் வைக்கத் தொடங்கி விட்டதால், தமிழக மக்களை ஏமாற்றி அதிமுக திசை திருப்புகிறது. பாஜகவுடன் கூட்டணி இல்லை. தேவை இருந்தால், தேர்தல் நேரத்தில் அதுபற்றி ஆலோசிக்கப்படும் என முதல்வர் பழனிசாமி தெரிவித்திருப்பதை யாரும் நம்பப் போவதில்லை.

சொந்தக்கட்சி எம்எல்ஏக்களே முதல்வரை மாற்ற வேண்டும் என பொறுப்பு ஆளுநராக இருந்த வித்யாசாகர் ராவிடம் மனு கொடுத்ததால், பழனிசாமி தலைமையிலான அமைச்சரவை பெரும்பான்மை இழந்தது. இருப்பினும், சட்டப்பேரவையில் இதற்கான வாக்கெடுப்பை நடத்தாமல் காலம் தாழ்த்தி, இழந்த பெரும்பான்மையைச் சமாளிக்கும் வகையில், டெல்லியில் கட்டப்பஞ்சாயத்து நடந்தது. ஈபிஎஸ், ஓபிஎஸ் தரப்பும் சுயநலநோக்கில் பல வித பேரங்களுடன் ஒன்றாக இணைத்து வைக்கப்பட்டதற்கு முழுக்க முழுக்க பாஜகவே காரணம்.

தமிழக திட்டங்கள் பற்றி வலியுறுத்துவதற்காக பிரதமரைச் சந்தித்தாக ஓ.பன்னீர்செல்வம், அப்போது பேட்டி கொடுத்த நிலையில், அப்படி எந்தத் திட்டத்தையும் அவர் வலியுறுத்தவில்லை என்பதை தகவலறியும் உரிமைச் சட்டம் மூலம் பெறப்பட்ட தகவல்கள் அம்பலப்படுத்திவிட்டன. முடக்கப்பட்ட இரட்டை இலைச் சின்னம், பாஜக தலையீட்டில் வழங்கப்பட்டது, மறுநாளே ஆர்.கே.நகர் தொகுதி இடைத்தேர்தல் தேதி அறிவிக்கப்பட்டு, அமோகமான பண விநியோகத்துடன் வாக்குப்பதிவு நடந்தது வரை, அனைத்திலும் பாஜகவுடனான கூட்டணியின் பலனையும் ஆதாயத்தையும் அதிமுக அனுபவித்தது.

இவையெல்லாம் மக்கள் மனதில் பதிந்துள்ள நிலையில், பாஜகவுடன் கூட்டணி இல்லை என்று முதல்வர் சொல்வதை தமிழக மக்கள் நம்ப தயாராக இல்லை. நெடுவாசல், கதிராமங்கலம் உள்ளிட்ட இடங்களில் விவசாயிகளும் பொதுமக்களும் நடத்திய போராட்டத்துக்கு செவிசாய்க்காமல், மத்திய அரசின் நிலைப்பாட்டுக்கு இணக்கமாக செயல்பட்ட அதிமுக அரசால் தமிழக விவசாயத்தின் எதிர்காலம் கேள்விக் குறியாகியுள்ளது.

‘நீட்’ தேர்வு தொடர்பாக சட்டப்பேரவையில் கொண்டு வரப்பட்ட சட்டத் திருத்தத்துக்கு மத்திய அரசின் ஒப்புதலைப் பெறத் தவறியது மட்டுமின்றி, பாஜகவுடனான கூட்டணியால் ஆட்சியைத் தக்க வைத்துக்கொள்ள வேண்டும் என்பதற்காக சமூக நீதியையே சாக்காட்டுக்கு அனுப்பியது இந்த ஆட்சிதான். ஆட்சியைக் காப்பாற்றி, பதவிச் சுகத்தை அனுபவித்துக் கொள்வதை மட்டுமே லட்சியமாகக் கொண்டு செயல்படும் ஈபிஎஸ் - ஓபிஎஸ் இருவரும் பாஜகவுடன் கூட்டணி வைத்து, அதன் கிளைக்கட்சியாக அதிமுகவை மாற்றிவிட்டார்கள்.


Sign up to receive our newsletter in your inbox every day!

You May Like

More From This Category

More From this Author