‘குயிக் காமர்ஸ்’ என அழைக்கப்படும் விரைவு வணிகம் டாப் கியரில் பயணிக்க ஆரம்பித்திருக்கிறது. இன்றைக்கு இணையவழியில் (ஆன்லைன்) விற்பனை செய்யப்படும் அன்றாடத் தேவைக்கான நுகர்வோர் பொருள்களில் (FMCG) சுமார் 75% வரை விரைவு வணிகம் மூலம் நடைபெறுவதாக டாபர், டாடா கன்ஸ்யூமர் ப்ராடக்ட்ஸ், ஐடிசி, பார்லே போன்ற நிறுவனங்களின் உயர் அதிகாரிகள் கூறியிருக்கின்றனர்.
இந்த விரைவு வணிகம் நுகர்வோரின் பழக்க வழக்கங்களிலும், சில்லறை வணிகம் சார்ந்த மற்ற சானல்களின் பங்களிப்பிலும் பெரும் மாற்றத்தை ஏற்படுத்தி வருகிறது. விரைவு வணிகத் தளத்தில் நுகர்வோரின் தேவைக்கேற்ப பெருவாரியான பொருள்கள் சேர்க்கப்பட்டு வருகின்றன. ஆர்டர் செய்த 10-15 நிமிடங்களில் பொருள்கள் டெலிவரி செய்யப்படுகின்றன. இன்றைக்கு அன்றாடத் தேவைக்கான பொருள்களையும் தாண்டி நீடித்து உழைக்கும் பொருள்களான போன், கெட்டில்கள், மிக்ஸர்-கிரைண்டர் போன்றவையும் ஆர்டர் செய்த 30 நிமிடங்களுக்குள் வீடு தேடி வருகிறது.
