இந்தியப் பங்குச் சந்தையின் பிம்பம் வேகமாக மாறி வருகிறது. ஒரு காலத்தில் அனுபவமிக்க மூத்த முதலீட்டாளர்கள் மட்டுமே ஆதிக்கம் செலுத்திய இந்தத் துறையில், இன்று 20 வயதைக் கடந்த இளம் தலைமுறையினர் (ஜென் ஸீ) அதிக அளவில் கால்பதித்து வருகின்றனர்.
ஆனால், அதிக லாபத்துக்கு ஆசைப்பட்டு இவர்கள் எடுக்கும் பேராபத்து நிறைந்த முடிவுகள், பெரும் நிதி இழப்பிலேயே முடிவடைகின்றன என்பது புள்ளிவிவரங்களின் மூலம் தெரிய வருகிறது. இந்தியப் பங்குச் சந்தையில் 30 வயதுக்குட்பட்ட முதலீட்டாளர்களின் எண்ணிக்கை கணிப்புகளை விட மிக வேகமாகக் அதிகரித்து வருகிறது.
37.9% பங்களிப்பு: இந்தியாவின் மொத்த முதலீட்டாளர்களில் 30 வயதுக்குட்பட்டவர்களின் பங்கு தற்போது 37.9% ஆக உயர்ந்துள்ளது. 5 ஆண்டுகளுக்கு முன்பு இது வெறும் 23.5% ஆக மட்டுமே இருந்தது.
அதேநேரம், தேசிய பங்குச் சந்தை (என்எஸ்இ) தரவுகளின்படி, இந்திய முதலீட்டாளர்களின் சராசரி வயது 2020-ல் 38-ஆக இருந்தது, இது தற்போது 33-ஆக குறைந்துள்ளது.
டிமேட் கணக்குகள் அதிகரிப்பு: நாட்டின் மொத்த டிமேட் கணக்குகளின் எண்ணிக்கை 23 கோடியைத் தாண்டியுள்ளது. இதில் புதிதாகத் தொடங்கப்படும் 4-ல் 3 கணக்குகள் 30 வயதுக்குட்பட்ட இளைஞர்களுடையதே என்கிறது புள்ளிவிவரம்.
இளைஞர்கள் பாரம்பரியமிக்க வங்கி சேமிப்பு, தங்கம் அல்லது ரியல் எஸ்டேட் துறைகளில் முதலீடு செய்வதைத் தவிர்த்து பங்குச் சந்தையை தேர்வு செய்ய காரணம் என்ன என்பது அநேகம் பேரின் கேள்வியாக உள்ளது.
வேலையின்மை மற்றும் எதிர்கால பயம்: பட்டதாரிகளிடையே அதிகரித்து வரும் வேலையின்மையும், பாதுகாப்பற்ற வேலைச்சூழலுமே இளைஞர்களை விரைவான வருமானம் தேடத் தூண்டுகிறது.
15 முதல் 26 வயதுடைய இளைஞர்களிடையே வேலையின்மை 11.9% ஆக உள்ளது. பட்டதாரிகளில் ஆண்கள் 29%, பெண்கள் 36.9% என வேலையின்மை நிலவுகிறது. நாட்டில் 15 முதல் 29 வயதுக்குட்பட்ட 8.7 கோடி இளைஞர்கள் வேலைவாய்ப்பின்றி இருப்பதாக நிதி ஆயோக் கூறுகிறது.
ஜன் தன், ஆதார், யுபிஐ மற்றும் எளிமையான செயலி வடிவமைப்பு போன்றவை இன்றைய இளைஞர்களை பங்குச் சந்தைக்குள் எளிதாக ஈர்க்கும் முக்கிய காரணங்களாக அமைந்துள்ளன.
ஃபின்ப்ளூயன்சர்களின் (Finfluencers) தாக்கம்: சமூக வலைதளங்களில் முறையான அங்கீகாரமின்றி ஆலோசனைகளை வழங்கும் நிதிச் செல்வாக்காளர்கள் எனப்படும் ஃபின்ப்ளூயன்சர்கள், ஆப்ஷன்ஸ், ஸ்மால் கேப் பங்குகளின் ஆபத்துகளை மறைத்து கவர்ச்சிகரமான லாபங்களை மட்டுமே முதலீட்டாளர்களிடம் காட்டுகின்றனர்.
ஆன்லைன் கேமிங் மற்றும் `ஃபேண்டஸி' விளையாட்டுகளுக்குத் தடை விதிக்கப்பட்ட பிறகு, விரைவாகப் பணம் ஈட்ட நினைக்கும் இளைஞர்கள் பங்குச் சந்தையின் 'ஆப்ஷன்ஸ்' வர்த்தகத்தை நோக்கி நகர்ந்துள்ளது தெரியவந்துள்ளது.
கசப்பான பாடம்
இதனால், ஜென் ஸீயின் அனுபவமின்மையும், பேராசையும் சேர்ந்து இளம் வர்த்தகர்களுக்கு மிகப்பெரிய நிதிப் பேரழிவையே ஏற்படுத்தி உள்ளன.
91% முதலீட்டாளர்களுக்கு நஷ்டம்: செபி வெளியிட்ட அறிக்கையின்படி, எஃப் அண்ட் ஓ வர்த்தகத்தில் ஈடுபடும் 91% தனிநபர் வர்த்தகர்கள் நஷ்டத்தையே சந்தித்துள்ளனர்.
ரூ.1.05 லட்சம் கோடி இழப்பு: கடந்த நிதியாண்டில் மட்டும் இந்த இளைய தலைமுறை வர்த்தகர்களின் நிகர இழப்பு 41% அதிகரித்து, ரூ.1.05 லட்சம் கோடியைத் தாண்டியுள்ளது என்ற அதிர்ச்சி அளிக்கும் தகவல் வெளியாகி உள்ளது.
எஃப் அண்ட் ஓ வர்த்தகத்தில் ஈடுபடும் 30 வயதுக்குட்பட்டவர்களின் எண்ணிக்கை 31-லிருந்து 43% ஆக உயர்ந்துள்ளது. தொடர்ந்து நஷ்டமடைந்த போதிலும் 75 சதவீதத்துக்கும் அதிகமானோர் மீண்டும் மீண்டும் வர்த்தகம் செய்து பணத்தை இழக்கின்றனர்.
அடுத்து செய்ய வேண்டியது என்ன?
பொறுமையாக இருங்கள் என்று ஜென் ஸீ இளைஞர்களுக்கு வெறும் அறிவுரை கூறுவது மட்டும் இதற்கான தீர்வாக மாறிவிடாது. அதற்கு பதிலாக பங்கு வர்த்தகச் செயலிகளின் வடிவமைப்பு மற்றும் விளம்பரங்கள் மீது செபி கடுமையான கட்டுப்பாடுகளைக் கொண்டுவர வேண்டும்.
மாணவர்கள் தங்களின் முதல் வர்த்தகத்தைத் தொடங்குவதற்கு முன்பே, அவர்களுக்குச் சரியான நிதி விழிப்புணர்வை பள்ளி மற்றும் கல்லூரிகளிலேயே வழங்க வேண்டியது காலத்தின் கட்டாயமாகும்.
