வீடியோ கேம்களிலும் கார்ட்டூன் தொடர்களிலும்தான் அவற்றின் கதாபாத்திரங்கள் சலிப்பும் களைப்புமின்றி ஓடிக்கொண்டே இருக்கும். நிஜ வாழ்வில் நம்மால் அப்படி இருக்க முடியாது என்பதைப் புரிந்துகொண்டு புத்துணர்ச்சியை உணர்வதற்கு மனதைப் பழக்கிக் கொள்வதுத் தேர்வில் சாதனை படைக்க நமக்கு உதவும். தேர்வு நேரத்தில் உடலுக்கும் மனதுக்கும் புத்துணர்வூட்டக்கூடிய சில எளிய வழிகள்:
நண்பர்களுடன் அரட்டை
தேர்வுகளுக்கு இடையில் ஒரு நாளுக்கு மேல் விடுமுறை கிடைத்தால், பரீட்சை முடிந்த நாளின் மீதிப் பொழுதை ஓய்வுக்காக ஒதுக்குங்கள். கூடுமானவரை மூளைக்கு வேலை கொடுக்கும் செயல்களில் ஈடுபடுவதை தவிருங்கள். நண்பர்களுடன் அரட்டை அடிப்பது, குழுவாக விளையாடுவது, நல்ல இசையைக் கேட்டவாறு இளைப்பாறுவது போன்ற செயல்களில் ஈடுபடலாம்.
விடுமுறையை எப்படிக் கொண்டாடலாம்
படிப்புக்கு அவ்வப்போது சிறிது இடைவெளி கொடுத்து, விடுமுறையை எப்படிக் கொண்டாடலாம் என்று விரிவாகத் திட்டமிட்டு மகிழுங்கள். ஒவ்வொரு தேர்வு முடியும்போதும் விடுமுறைக்கு இன்னும் எத்தனை நாட்கள் மிச்சமுள்ளன என்று எண்ணி மகிழுங்கள்.
சலிப்பை நீக்க இடத்தை மாற்றுங்கள்
ஒவ்வொரு தேர்வின்போதும் நீங்கள் படிக்கும் இடத்தையோ அறையையோ மாற்றிக்கொள்ளுங்கள். இந்த மாற்றத்தில் உங்களுடைய மனம் மயங்கிச் சலிப்பு நீங்கிப் புத்துணர்ச்சி பெறும்.
சிறு துயில்
தேர்வு எழுதி வீடு திரும்பியவுடன், சாப்பிட்டுவிட்டு சிறிது நேரம் தூங்குங்கள். ஆனால், இந்தத் தூக்கம் முப்பது நிமிடத்தைத் தாண்டாமல் பார்த்துக்கொள்ளுங்கள். சிறு துயில் அளிக்கும் ஆற்றல் காரணமாகத்தான் அது ‘power nap’ என்று அழைக்கப்படுகிறது.
மாலையும் குளியுங்கள்
தேர்வு நாட்களில் காலையும் மாலையும் குளியுங்கள். காலைக் குளியல் தேர்வு எழுதுவதற்கும் மாலைக் குளியல் அடுத்த நாள் தேர்வு எழுதுவதற்கும் புத்துணர்ச்சி அளிக்கும். நீண்ட தலைமுடி கொண்டவர்கள் மாலையில் தலைக்குக் குளிப்பதைத் தவிர்க்கலாம்.
கதை கேளுங்கள்
வீட்டில் தாத்தா - பாட்டியிடமோ, அப்பா – அம்மாவிடமோ அவர்களின் சிறுவயது கதையைச் சொல்லச் சொல்லிச் சிறிது நேரம் தூங்கும்முன் கேளுங்கள். அது அவர்களின் படிப்பு சம்பந்தமான கதையாக இருந்தால் அங்கிருந்து ஓடிவிடுங்கள்.