பாஃபோஸ்: சைப்ரஸ் நாட்டில் உள்ள பாஃபோஸ் நகரில் கேண்டிடேட்ஸ் செஸ் தொடர் நடைபெற்று வருகிறது. இதன் 4-வது சுற்றில் இந்திய கிராண்ட் மாஸ்டரான ஆர்.பிரக்ஞானந்தா, ஜெர்மனியின் மத்தியாஸ் ப்ளூபாமுடன் மோதினார். இதில் கருப்பு காய்களுடன் விளையாடிய பிரக்ஞானந்தா 37-வது நகர்த்தலின் போது டிரா செய்தார்.
உஸ்பெகிஸ்தானின் ஜவோகிர் சிந்தாரோவ், அமெரிக்காவின் ஃபேபியானோ கருனாவுடன் மோதினார். இதில் 36-வது நகர்த்தலின் போது ஜவோகிர் சிந்தாரோவ் வெற்றி பெற்றார். இன்னும் 10 சுற்றுகள் உள்ள நிலையில் ஜவோகிர் சிந்தாரோவ் 3.5 புள்ளிகளுடன் முதலிடத்தில் உள்ளார்.
ஃபேபியானோ கருனா 2.5 புள்ளிகளுடன் 2-வது இடம் வகிக்கிறார். மத்தியாஸ் ப்ளூபாம், பிரக்ஞானந்தா, நெதர்லாந்தின் அனிஷ் கிரி ஆகியோர் தலா 2 புள்ளிகளுடன் முறையே 3 முதல் 5-வது இடத்தில் உள்ளனர். சீனாவின் வெய் யி 1.5 புள்ளிகளுடன் 6-வது இடத்திலும், அமெரிக்காவின் ஹிகாரு நகமுரா 1.5 புள்ளிகளுடன் 7-வது இடத்திலும், ரஷ்யாவின் ஆண்ட்ரே எசிபென்கோ ஒரு புள்ளியுடன் 8-வது இடத்திலும் உள்ளனர்.
