டாக்கா: வங்கதேச அணிக்கு எதிரான 2-வது ஒருநாள் கிரிக்கெட் போட்டியில் நியூஸிலாந்து அணி 6 விக்கெட்கள் வித்தியாசத்தில் தோல்வி அடைந்தது. டாக்கா நகரில் நேற்று நடைபெற்ற இந்த ஆட்டத்தில் முதலில் பேட் செய்த நியூஸிலாந்து அணி 48.4 ஓவர்களில் 198 ரன்களுக்கு ஆட்டமிழந்தது.
அதிகபட்சமாக தொடக்க வீரரான நிக் கெல்லி 102 பந்துகளில், 14 பவுண்டரிகளுடன் 83 ரன்கள் சேர்த்தார். ஹென்றி நிக்கோல்ஸ் 13, வில் யங் 2, கேப்டன் டாம் லேதம் 14, முகமமு அப்பாஸ் 19, டீன் ஃபாக்ஸ்கிராஃப்ட் 15, ஜோஷ் கிளார்க்சன் 6, பிளேயர் டிக்னர் 12, ஜெய்டன் லெனாக்ஸ் 0, வில் ஓ’ரூர்க் 6 ரன்களில் நடையை கட்டினர்.
வங்கதேச அணி தரப்பில் வேகப்பந்து வீச்சாளரான நஹித் ராணா 10 ஓவர்களை வீசி ஒரு மெய்டனுடன் 32 ரன்களை மட்டும் விட்டுக்கொடுத்து 5 விக்கெட்களை வீழ்த்தினார். ஷோரிஃபுல் இஸ்லாம் 2 விக்கெட்கள் கைப்பற்றினார். 199 ரன்கள் இலக்குடன் பேட் செய்த வங்கதேச அணி 35.3 ஓவர்களில் 4 விக்கெட்கள் இழப்புக்கு 199 ரன்கள் எடுத்து வெற்றி பெற்றது.
தன்ஸித் ஹசன் 58 பந்துகளில், 4 சிக்ஸர்கள், 10 பவுண்டரிகளுடன் 76 ரன்களும், நஜ்முல் ஹோசைன் ஷான்டோ 71 பந்துகளில், 2 சிக்ஸர்கள், 5 பவுண்டரிகளுடன 50 ரன்களும் விளாசினர்.
6 விக்கெட்கள் வித்தியாசத்தில் வெற்றி பெற்ற வங்கதேச அணி 3 ஆட்டங்கள் கொண்ட ஒருநாள் கிரிக்கெட் போட்டித் தொடரை 1-1 என சமநிலையை அடையச் செய்துள்ளது. முதல் ஒருநாள் போட்டியில் நியூஸிலாந்து அணி 26 ரன்கள் வித்தியாசத்தில் வெற்றி பெற்றிருந்தது. கடைசி மற்றும் 3-வது ஒருநாள் போட்டி சட்டோகிராமில் வரும் 23-ம் தேதி நடைபெறுகிறது.
