பியூனஸ் அயர்ஸ்: பிஃபா உலகக் கோப்பை இறுதிப் போட்டியில் கடந்த ஜூலை மாதம் ஸ்பெயினிடம் தோல்வியடைந்த சில வாரங்களுக்குப் பிறகு சர்வதேச கால்பந்தில் இருந்து ஓய்வு பெறுவதாக மெஸ்ஸி அறிவித்திருந்தார். ஆனால், மெஸ்ஸிக்கு உரிய பிரியாவிடையை வழங்குவதற்காக அர்ஜெண்டினா கால்பந்து சங்கம் அவரை மீண்டும் ஒரு போட்டியில் விளையாட அழைத்தது. இதை மெஸ்ஸி ஏற்றுக்கொண்டிருந்தார்.
இதன்படி அர்ஜெண்டினாவின் பியூனஸ் அயர்ஸில் உள்ள எஸ்டாடியோ மோனுமென்டல் மைதானத்தில் நேற்று முன்தினம் இரவு அர்ஜெண்டினா - பெனின் கால்பந்து அணிகள் நட்புரீதியிலான போட்டியில் மோதின. இந்த ஆட்டம் ஜாம்பவான் லயோனல் மெஸ்ஸிக்கு பிரியா விடை கொடுக்கும் போட்டியாக அமைந்தது. இந்த போட்டியில் அர்ஜெண்டினா 3-0 என்ற கோல் கணக்கில் வெற்றி பெற்றது.
ஆட்டத்தின் 71-வது நிமிடத்தில் கிடைத்த பெனால்டி வாய்ப்பை இடது காலால் அபாரமாக கோலாக மாற்றி அசத்தினார் 39 வயதான லயோனல் மெஸ்ஸி. அவர், கோல் அடித்ததும் மைதானத்தில் திரண்டிருந்த 85 ஆயிரம் ரசிகர்களும் அரங்கமே அதிர மெஸ்ஸி, மெஸ்ஸி என முழக்கமிட்டனர். தொடர்ந்து 2 கோல்கள் அடிக்க மெஸ்ஸி உதவியும் செய்திருந்தார்.
21 ஆண்டுகளாக அர்ஜெண்டினா அணிக்காக விளையாடிய மெஸ்ஸி, 2 கோபா அமெரிக்கா பட்டங்கள் மற்றும் ஓர் உலகக் கோப்பையை வென்ற நிலையில் தனது சர்வதேச பயணத்தை நிறைவு செய்துள்ளார். அர்ஜெண்டினா அணிக்காக 208 போட்டிகளில் விளையாடி 126 கோல்கள் அடித்துள்ளார்.
போட்டி முடிந்ததும் ரசிகர்களிடம் லயோனல் மெஸ்ஸி, ரசிகர்கள் மத்தியில் பேசும் போது, “அர்ஜெண்டினா அணிக்காக விளையாடுவது ஒருவருக்கு கிடைக்கக்கூடிய மிக அழகான விஷயம். உண்மையிலேயே இதைவிட அழகானது எதுவும் இல்லை. தவிர்க்க முடியாமல் எனது கால்பந்து வாழ்க்கையின் மிகவும் சோகமான நாளை எதிர்கொள்கிறேன். தேசிய அணிக்கு விடை கொடுக்க வேண்டிய நாள் இது. உங்கள் அனைவரிடமும் இருந்து விடைபெறுகிறேன்.
உங்களை நான் மிகவும் தவறவிடுவேன். தேசிய அணியின் சீருடையை அணிந்து விளையாடுவதையும் தவறவிடுவேன். ஆனால் இனிமேல் இந்த வீரர்களுக்கும், அவர்களுக்குப் பிறகு வரும் வீரர்களுக்கும் ஆதரவாக உங்களுடன் நானும் இருப்பேன். எப்போதும் ஒன்றாக இருப்போம்” என்று உருக்கமாக தெரிவித்தார்.
போட்டி முடிந்ததும் மோனுமென்டல் மைதானத்தின் வானில் ட்ரோன் கண்காட்சி நடைபெற்றது. மெஸ்ஸியின் கால்பந்து வாழ்க்கையின் முக்கிய தருணங்கள் வானில் ஒளிர்ந்தன. குறிப்பாக 2022-ம் ஆண்டு கத்தாரில் உலகக் கோப்பையை வென்றபோது மெஸ்ஸி கோப்பையைத் தூக்கி நிற்கும் காட்சியும் இடம்பெற்றது.
போட்டிக்காக பேருந்தில் பயணம் செய்து வந்த போதும், பின்னர் அர்ஜென்டினா தேசிய கீதம் இசைக்கப்பட்டபோதும் மெஸ்ஸி மற்றும் தலைமை பயிற்சியாளர் லியோனல் ஸ்கலோனி ஆகியோர் கண்ணீர் சிந்தினர். மெஸ்ஸியுடன் அவரது மகன்கள் தியாகோ, மேடியோ மற்றும் சிரோ ஆகியோரும் மைதானத்தில் இருந்தனர்.
1978, 1986 மற்றும் 2022 உலகக் கோப்பைகளை வென்ற அர்ஜெண்டினா அணிகளின் வீரர்களும் அவர்களது குடும்பத்தினரும் மெஸ்ஸிக்கான பிரியாவிடை நிகழ்ச்சியில் பங்கேற்றனர்.
