நியூஸிலாந்து அணியின் பேட்ஸ்மேன் கிளென் பிலிப்ஸ் விக்கெட்டை கைப்பற்றிய மகிழ்ச்சியில் இந்திய அணியின் வேகப்பந்து வீச்சாளர் குர்னூர் பிரார்.
வெலிங்டன்: நியூஸிலாந்து அணிக்கு எதிரான 2-வது ஒருநாள் கிரிக்கெட் போட்டி மழையால் பாதிக்கப்பட்ட நிலையில் டக்வொர்த் லீவிஸ் விதிப்படி இந்திய அணி 4 ரன்கள் வித்தியாசத்தில் வெற்றி பெற்றது.
வெலிங்டனில் உள்ள ஹென்றி மைதானத்தில் நேற்று நடைபெற்ற இந்த ஆட்டம் மழை மற்றும் மைதான ஈரப்பதம் காரணமாக 47 ஓவர்களை கொண்டதாக நடத்தப்பட்டது.
முதலில் பேட் செய்த நியூஸிலாந்து அணி 41 ஓவர்களில் 134 ரன்களுக்கு ஆட்டமிழந்தது. அதிகபட்சமாக டேரில் மிட்செல் 104 பந்துகளில், 2 சிக்ஸர்கள், 5 பவுண்டரிகளுடன் 55 ரன்களும், கேப்டன் மிட்செல் சாண்ட்னர் 38 பந்துகளில், 2 சிக்ஸர்கள், ஒரு பவுண்டரியுடன் 31 ரன்களும் எடுத்தனர்.
வில் யங் 6, டிம் ஷெய்பர்ட் 0, ஹென்றி நிக்கோல்ஸ் 11, டாம் லேதம் 7, கிளென் பிலிப்ஸ் 0, நேதன் ஸ்மித் 3, கைல் ஜேமிசன் 7, பிளேர் டிக்னர் 2 ரன்களில் நடையை கட்டினர்.
இந்திய அணி தரப்பில் குர்னூர் பிரார் 10 ஓவர்களை வீசி 2 மெய்டன்களுடன் 30 ரன்களை விட்டுக்கொடுத்து 4 விக்கெட்களை வீழ்த்தினார். அகிப் நபி, அன்ஷுல் கம்போஜ், அக்சர் படேல் ஆகியோர் தலா 2 விக்கெட்களை கைப்பற்றினர்.
அர்ஷ்தீப் சிங் 7 ஓவர்களை வீசி ஒரு மெய்டனுடன் 16 ரன்களை மட்டுமே வழங்கிய நிலையில் விக்கெட் ஏதும் கைப்பற்றவில்லை.
இந்திய அணியின் பந்துவீச்சாளர்கள் ஒட்டுமொத்தமாக 176 ‘டாட் பால்களை’ வீசி அசத்தியிருந்தனர். இதையடுத்து 135 ரன்கள் இலக்குடன் பேட் செய்த இந்திய அணியும் சீரான இடைவெளியில் விக்கெட்களை இழந்து நெருக்கடியை சந்தித்தது.
கேப்டன் ஷுப்மன் கில் 0, விராட் கோலி 7 ரன்களில் நடையை கட்டினர். அதிரடியாக விளையாடிய ரோஹித் சர்மா 28 பந்துகளில், 2 பவுண்டரிகள், 2 சிக்ஸர்களுடன் 23 ரன்கள் எடுத்த நிலையில் கைல் ஜேமிசன் பந்தில் வெளியேறினார். இதையடுத்து களமிறங்கிய அக்சர் படேல் 7 ரன்களில் ஆட்டமிழந்தார்.
47 ரன்களுக்கு 4 விக்கெட்களை இழந்த நிலையில் களமிறங்கிய கே.எல்.ராகுல் நிதானமாக விளையாடினார். மறுமுறையில் சீராக ரன்கள் சேர்த்த ஸ்ரேயஸ் ஐயர் 45 பந்துகளில், ஒரு சிக்ஸர், 4 பவுண்டரிகளுடன் 30 ரன்கள் எடுத்த நிலையில் ஆட்டமிழந்தார். இதன் பின்னர் நமன்திர் 12, அன்ஷுல் கம்போஜ் ஒரு ரன்னில் வெளியேறினர்.
இந்திய அணி 26 ஓவர்களில் 7 விக்கெட்கள் இழப்புக்கு 113 ரன்கள் எடுத்திருந்த போது மழை காரணமாக ஆட்டம் தடைபட்டது.
கேஎல்.ராகுல் 38 பந்துகளில், 2 சிக்ஸர்கள், 2 பவுண்டரிகளுடன் 26 ரன்களும், அகிப் நபி ஒரு ரன்னும் சேர்த்து களத்தில் இருந்தனர்.
மழை நின்ற பின்னர் டக்வொர்த் லீவிஸ் விதிப்படி இந்திய அணி 37 ஓவர்களில் 133 ரன்கள் எடுக்க வேண்டும் என இலக்கு மாற்றி அமைக்கப்பட்டது. ஆனால் போட்டி மீண்டும் தொடங்குவதற்கு முன்னதாக மீண்டும் மழை பெய்தது.
இதனால் ஆட்டத்தை தொடர்ந்து நடத்த முடியாத சூழ்நிலை ஏற்பட்டது. இதனால் வெற்றியை தீர்மானிக்க டக்வொர்த் லீவிஸ் விதி முறை கடைப்பிடிக்கப்பட்டது. இதில் இந்திய அணி 4 ரன்கள் வித்தியாசத்தில் வெற்றி பெற்றதாக அறிவிக்கப்பட்டது.
நியூஸிலாந்து அணி சார்பில் கைல் ஜேமிசன், ஜேக்கப் டஃபி ஆகியோர் தலா 3 விக்கெட்களை கைப்பற்றினர். ஆட்ட நாயகனாக இந்திய வீரர் குர்னூர் பிரார் தேர்வானார். 4 ரன்கள் வித்தியாசத்தில் வெற்றி பெற்ற இந்திய அணி 5 ஆட்டங்கள் கொண்ட ஒருநாள் கிரிக்கெட் போட்டித் தொடரில் 2-0 என முன்னிலை வகிக்கிறது.
ஆக்லாந்தில் நடைபெற்ற முதல் போட்டியில் இந்திய அணி 5 விக்கெட்கள் வித்தியாசத்தில் வெற்றி பெற்றிருந்தது. 3-வது போட்டி வரும் 10-ம் தேதி ஹாமில்டன் நகரில் உள்ள செடன்பார்க் மைதானத்தில் நடைபெறுகிறது.
