ஹூஸ்டன்: 6 உலகக் கோப்பைகளிலும் கோலடித்த வீரர் என்ற சாதனையை போர்ச்சுகல் வீரர் கிறிஸ்டியானோ ரொனால்டோ பெற்றுள்ளார். நேற்று முன்தினம் இரவு ஹூஸ்டனில் உள்ள என்ஆர்ஜி மைதானத்தில் போர்ச்சுகல் அணி 5-0 என்ற கோல் கணக்கில் உஸ்பெகிஸ்தானை வீழ்த்தியது. இந்தப் போட்டியின்போது ரொனால்டோ 2 கோல்களை அடித்தார்.
இதன்மூலம் 2026 உலகக் கோப்பையில் தனது முதல் வெற்றியை போர்ச்சுகல் அணி பதிவு செய்தது. இந்தப் போட்டியின்போது தான் பங்கேற்ற 6 உலகக் கோப்பை போட்டிகளிலும் தனது அணி சார்பில் கோல் அடித்த வீரர் என்ற மாபெரும் சாதனையை ரொனால்டோ செய்துள்ளார்.
2006, 2010, 2014, 2018, 2022, 2026 என 6 வெவ்வேறு உலகக் கோப்பைத் தொடர்களிலும் அவர் கோலடித்துள்ளார். 6 உலகக் கோப்பைகளில் அர்ஜெண்டினா வீரர் லயோனஸ் மெஸ்ஸி விளையாடியுள்ள போதிலும், அவர் 2010 உலகக் கோப்பையின்போது கோலடிக்க வில்லை.
நேற்றைய போட்டியின்போது 41 வயது 138 நாட்கள் நிரம்பியுள்ள நிலையில் 2 கோல்கள் அடித்த ரொனால்டோ, உலகக் கோப்பை வரலாற்றில் ஒரே போட்டியில் இரண்டு அல்லது அதற்கு மேற்பட்ட கோல்கள் அடித்த அதிக வயதான வீரர் என்ற சாதனையைப் படைத்தார். இதற்கு முன் இந்த சாதனை மெஸ்ஸியின் வசம் இருந்தது.
மேலும், உலகக் கோப்பையில் கோல் அடித்த இரண்டாவது அதிக வயதான வீரர் என்ற பெருமையையும் ரொனால்டோ பெற்றார். இந்தப் பட்டியலில் முதலிடத்தில் 1994 உலகக் கோப்பையில் 42 வயது 39 நாட்களில் கோல் அடித்த ரோஜர் மில்லா உள்ளார்.
அதுமட்டுமல்லாமல், ஒரு நாட்டுக்காக உலகக் கோப்பைப் போட்டியில் இளம் வயதிலும் அதிக வயதிலும் கோல் அடித்த வீரர்கள் என்ற தனிச்சிறப்பை பெற்றவர்களின் பட்டியலிலும் ரொனால்டோ இணைந்தார். இந்தப் பட்டியலில் முதல் 2 இடங்களில் மைக்கேல் லாட்ரப் (டென்மார்க்), லயோனல் மெஸ்ஸி (அர்ஜெண்டினா) ஆகியோர் உள்ளனர். 3-வது இடத்தில் ரொனால்டோ இடம்பெற்றுள்ளார்.
உஸ்பெகிஸ்தானுக்கு எதிரான போட்டி ரொனால்டோவின் 24-வது உலகக் கோப்பைப் போட்டி ஆகும். இந்த வரிசையில் அர்ஜெண்டினாவின் மெஸ்ஸி (28 போட்டிகள்) மற்றும் ஜெர்மனியின் லோத்தர் மத்தாயேஸ் (25 போட்டிகள்) மட்டுமே முன்னிலையில் உள்ளனர்.
