வான்கூவர்: உலகக் கோப்பை கால்பந்து தொடரில் கனடாவின் வான்கூவரில் உள்ள பிசி பிளேஸ் மைதாதனத்தில் நேற்று ‘ஜி’ பிரிவில் நடைபெற்ற லீக் ஆட்டத்தில் பெல்ஜியம் - நியூஸிலாந்து அணிகள் மோதின. இதில் பெல்ஜியம் அணி 5-1 என்ற கோல் கணக்கில் வெற்றி பெற்றது.
அந்த அணி தரப்பில் லியாண்ட்ரோ ட்ராஸார்ட் 2 கோல்களும் (28 மற்றும் 50-வது நிமிடங்கள்), கெவின் டி ப்ரூய்ன் (66-வது நிமிடம்), ரொமலு லுகாகு (86-வது நிமிடம்) அலெக்சிஸ் சேலிமேக்கர்ஸ் (90 +4-வது நிமிடம்) ஆகியோர் தலா ஒரு கோலும் அடித்தனர். நியூஸிலாந்து அணி சார்பில் எலைஜா ஜஸ்ட் (84-வது நிமிடம்) ஒரு கோல் அடித்தார்.
பெல்ஜியம் அணிக்கு இது முதல் வெற்றியாக அமைந்தது. அந்த அணி தனது முதல் ஆட்டத்தில் எகிப்து அணிக்கு எதிராக 1-1 என்ற கோல் கணக்கிலும், 2-வது ஆட்டத்தில் ஈரானுக்கு எதிராக கோல்களின்றியும் டிரா செய்திருந்தது. தற்போதைய வெற்றியின் மூலம் பெல்ஜியம் அணி 5 புள்ளிகளுடன் தனது பிரிவில் முதலிடம் பிடித்து நாக் அவுட் சுற்றில் கால்பதித்தது.
அதேவேளையில் நியூஸிலாந்து அணி ஒரு வெற்றியை கூட பெற முடியாமல் இம்முறையும் ஏமாற்றத்துடன் வெளியேறியது. அந்த அணி நடப்பு தொடரில் 3 ஆட்டங்களில் 2 தோல்வி, ஒரு டிராவை பதிவு செய்துள்ளது.
