மெல்பர்ன்: ஆஸ்திரேலிய ஓபன் டென்னிஸ் தொடரில் மெல்பர்ன் நகரில் நடைபெற்று வருகிறது. இதன் 4-வது நாளான நேற்று ஆடவர் ஒற்றையர் பிரிவு 2-வது சுற்றில் முதல் நிலை வீரரான ஸ்பெயினின் கார்லோஸ் அல்கராஸ் 7-6 (7-4), 6-3, 6-2 என்ற செட் கணக்கில் 102-ம் நிலை வீரரான ஜெர்மனியின் யானிக் ஹான்ஃப்மேனை வீழ்த்தி 3-வது சுற்றுக்கு முன்னேறினார்.
10-ம் நிலை வீரரான கஜகஸ்தானின் அலெக்சாண்டர் பப்ளிக் 7-5, 6-4, 7-5 என்ற செட் கணக்கில் 54-ம் நிலை வீரரான ஹங்கேரியின் மார்டன் ஃபுசோவிக்ஸையும், 11-ம் நிலை வீரரான ரஷ்யாவின் டேனியல் மெத்வதேவ் 6-7 (9-11), 6-3, 6-4, 6-2 என்ற செட் கணக்கில் 83-ம் நிலை வீரரான பிரான்ஸின் குவென்டின் ஹாலிஸையும், 13-ம் நிலை வீரரான ரஷ்யாவின் ஆந்த்ரே ரூப்லெவ் 6-4, 6-3, 4-6, 7-5 என்ற செட் கணக்கில் 151-ம் நிலை வீரரான போர்ச்சுகலின் ஜெய்ம் ஃபரியாவையும் வீழ்த்தி 3-வது சுற்றில் நுழைந்தனர்.
14-ம் நிலை வீரரான ஸ்பெயினின் அலெஜான்ட்ரோ டேவிடோவிச் ஃபோகின் 6-3, 7-6 (7-3), 5-7, 4-6, 6-4 என்ற செட் கணக்கில் 63-ம் நிலை வீரரான அமெரிக்காவின் ரெய்லி ஓபெல்காவையும், 18-ம் நிலை வீரரான அர்ஜெண்டினாவின் பிரான்சிஸ்கோ செருண்டோலோ 6-3, 6-2, 6-1 என்ற செட் கணக்கில் 66-ம் நிலை வீரரான போஸ்னியா-ஹெர் சகோவின் டாமிர் ட்சும்ஹூரையும், 19-ம்நிலை வீரரான அமெரிக்காவின் டாமி பால் 6-3, 6-4, 6-2 என்ற செட் கணக்கில் 103-ம் நிலை வீரரான அர்ஜெண்டினாவின் தியாகோ டிரண்டேவையும் தோற்கடித்து 3-வது சுற்றுக்கு முன்னேறினர்.
மகளிர் ஒற்றையர் பிரிவு 2-வது சுற்றில் முதல் நிலை வீராங்கனையான பெலாரஸின் அரினா சபலென்கா 6-3, 6-1 என்ற நேர் செட் கணக்கில் தகுதி நிலை வீராங்கனையான சீனாவின் பா ஜூவோஸுவானையும், 3-ம் நிலை வீராங்கனையான அமெரிக்காவின் கோ கோ காஃப் 6-2, 6-2 என்ற செட் கணக்கில் 69-ம் நிலை வீராங்கனையான செர்பியாவின் ஓல்கா டானிலோவிக்கையும், 7-ம் நிலை வீராங்கனையான இத்தாலியின் ஜாஸ்மின் பவுலி 6-2, 6-3 என்ற செட் கணக்கில் 57-ம் நிலை வீராங்கனையான போலந்தின் மாக்டலீனா ஃப்ரீச்சையும் வீழ்த்தி 3-வது சுற்றுக்கு முன்னேறினர்.
8-ம் நிலை வீராங்கனையான ரஷ்யாவின் மிர்ரா ஆண்ட்ரீவா 6-0, 6-4 என்ற செட் கணக்கில் 53-ம் நிலை வீராங்கனையான கிரீஸின் மரியா சக்காரியையும், 13-ம் நிலை வீராங்கனையான உக்ரைனின் எலினா ஸ்விட்டோலினா 7-5, 6-1 என்ற செட் கணக்கில் 134-ம் நிலை வீராங்கனையான போலந்தின் லிண்டா கிளிமோவிகோவாவையும், 14-ம் நிலை வீராங்கனையான டென்மார்க்கின் கிளாரா டவுசன் 6-3, 3-6, 7-5 என்ற செட் கணக்கில் 150-ம் நிலை வீராங்கனையான உஸ்பெகிஸ்தானின் போலினா குடெர்மெடோவாவையும் வீழ்த்தி 3-வது சுற்றில் நுழைந்தனர்.
28-ம் நிலை வீராங்கனையான கிரேட் பிரிட்டனின் எம்மாரடுகானு 6-7 (3-7), 2-6 என்ற செட் கணக்கில் 55-ம் நிலை வீராங்கனையான ஆஸ்திரியாவின் அனஸ்டசியா பொட்டாபோவாவிடம் அதிர்ச்சி தோல்வி அடைந்தார். 17-ம் நிலை வீராங்கனையான கனடாவின் விக்டோரியா எம்போகோ 6-4, 6-3 என்ற செட் கணக்கில் அமெரிக்காவின் கேட் மெக்நல்லியையும், 19-ம் நிலை வீராங்கனையான செக்குடியரசின் கரோரினா முச்சோவா 4-6, 6-4, 6-4 என்ற செட் கணக்கில் அமெரிக்காவின் அலிசியா பார்க்ஸையும், 23-ம் நிலை வீராங்கனையான ரஷ்யாவின் டயானா ஷ்னைடர் 3-6, 7-5, 6-3 என்ற செட் கணக்கில் ஆஸ்திரேலியாவின் தலியா கிப்சனையும் வீழ்த்தினர்.
இந்திய ஜோடி அசத்தல்:
ஆடவர் இரட்டையர் பிரிவு முதல் சுற்றில் இந்தியாவின் யுகி பாம்ப்ரி, சுவீடனின் ஆண்ட்ரே கோரன்சன் ஜோடி முதல் சுற்றில் 6-3 6-4 என்ற நேர் செட் கணக்கில் ஆஸ்திரேலியாவின் ஜேம்ஸ் டக்வொர்த், குரூஸ் ஹெவிட் ஜோடியை வீழ்த்தியது.
ஜூனியர் தகுதி சுற்று
ஆஸ்திரேலிய ஓபன் ஜூனியர் பிரிவில் நேற்று தகுதி சுற்று ஆட்டங்கள் நடைபெற்றன. இதில் மகளிர் ஒற்றையர் பிரிவில் இந்தியாவின் தியா ரமேஷ், தரவரிசையில் 86-வது இடத்தில் உள்ள அமெரிக்காவின் அனிதாவுடன் மோதினார்.
இந்த ஆட்டத்தில் தியா 7-5, 6-2 என்ற நேர் செட் கணக்கில் வெற்றி பெற்றார். தகுதி சுற்றின் 2-வது ஆட்டத்துக்கு முன்னேறியுள்ள தியா ரமேஷ் தமிழக டென்னிஸ் சங்கத்தின் நெக்ஸ் லெவல் திட்டத்தின் கீழ் பயிற்சி பெற்று வருகிறார்.
