சிட்னி: சிட்னி டெஸ்ட் போட்டியில் ஆஸ்திரேலிய அணி 5 விக்கெட்கள் வித்தியாசத்தில் இங்கிலாந்தை வீழ்த்தியது. இதையடுத்து ஆஷஸ் தொடரை 4-1 என்ற கணக்கில் ஆஸ்திரேலிய அணி கைப்பற்றியது. தொடர்நாயகன் விருதை மிட்செல் ஸ்டார்க் கைப்பற்றினார்.
இங்கிலாந்து அணி, ஆஸ்திரேலியாவில் சுற்றுப்பயணம் செய்து 5 போட்டிகள் கொண்ட ஆஷஸ் டெஸ்ட் தொடரில் விளையாடி வந்தது. 4 போட்டிகள் முடிந்த நிலையில் ஆஸ்திரேலியா 3-1 என்ற கணக்கில் முன்னிலையில் இருந்தது.இந்நிலையில் கடைசி மற்றும் 5-வது டெஸ்ட் போட்டி சிட்னி மைதானத்தில் கடந்த 4-ம் தேதி தொடங்கியது.
முதல் இன்னிங்ஸில் இங்கிலாந்து 384 ரன்களும், ஆஸ்திரேலியா 567 ரன்களும் குவித்தன. இதைத் தொடர்ந்து 2-வது இன்னிங்ஸை விளையாடிய இங்கிலாந்து அணி 4-ம் நாள் ஆட்ட நேர இறுதியில் 8 விக்கெட் இழப்புக்கு 302 ரன்கள் எடுத்திருந்தது. இந்நிலையில் நேற்று நடைபெற்ற கடைசி நாள் ஆட்டத்தை ஜேக்கப் பெத்தேல் 142 ரன்களுடனும், மேத்யூ பாட்ஸ் 0 ரன்களுடனும் தொடங்கினர்.
மேலும் 12 ரன்கள் சேர்த்த நிலையில் ஜேக்கப் பெத்தேல் மிட்செல் ஸ்டார்க் பந்தில் ஆட்டமிழந்தார். 265 பந்துகளில் 15 பவுண்டரிகளுடன் 154 ரன்கள் சேர்த்தார் பெத்தேல். இதையடுத்து விளையாட வந்த ஜோஷ் டங் 6 ரன்களில் ஸ்டார்க் பந்தில் அவுட்டானார். 88.2 ஓவர்களில் 342 ரன்களுக்கு இங்கிலாந்தின் இன்னிங்ஸ் முடிவுக்கு வந்தது. மேத்யூ பாட்ஸ் 18 ரன்களுடன் ஆட்டமிழக்காமல் இருந்தார்.
ஆஸ்திரேலிய அணி தரப்பில் ஸ்டார்க், பியூ வெப்ஸ்டர் 3, போலண்ட் 2, மைக்கேல் நேசர் ஒரு விக்கெட்டை வீழ்த்தினர். இதையடுத்து 160 ரன்கள் எடுத்தால் வெற்றி என்ற இலக்குடன் ஆஸ்திரேலிய அணி 2-வது இன்னிங்ஸை தொடங்கியது.தொடக்க ஆட்டக்காரர்கள் டிராவிஸ் ஹெட் 29, ஜேக் வெதரால்டு 34 ரன்கள் சேர்த்து ஆட்டமிழந்தனர். மார்னஸ் லபுஷேன் 37 ரன்கள் எடுத்த நிலையில் ரன்-அவுட்டானார்.
கேப்டன் ஸ்மித் 12 ரன்களும், உஸ்மான் கவாஜா 6 ரன்களும் எடுத்து வீழ்ந்தனர். இதனால் 5 விக்கெட் இழப்புக்கு 121 ரன்கள் என்ற நிலையில் ஆஸ்திரேலிய அணி இருந்தது. இருந்தபோதும், 6-வது விக்கெட்டுக்கு ஜோடி சேர்ந்த அலெக்ஸ் கேரியும், கேமரூன் கிரீனும் நிதானமாக விளையாடி அணியை வெற்றிக்கு அழைத்துச் சென்றனர்.
31.2 ஓவர்களில் 5 விக்கெட் இழப்புக்கு 161 ரன்கள் எடுத்து ஆஸ்திரேலிய அணி வெற்றி கண்டது. கேரி 16 ரன்களும், கிரீன் 22 ரன்களும் எடுத்து ஆட்டமிழக்காமல் இருந்தனர். ஜோஷ் டங் 3 விக்கெட்களையும், வில் ஜேக்ஸ் ஒரு விக்கெட்டையும் சாய்த்தனர். இந்த வெற்றியின் மூலம் ஆஷஸ் தொடரை ஆஸ்திரேலிய அணி 4-1 என்ற கணக்கில் கைப்பற்றி சாதனை படைத்துள்ளது. ஆட்டநாயகனாக டிராவிஸ் ஹெட்டும், தொடர்நாயகனாக மிட்செல் ஸ்டார்க்கும் தேர்வு செய்யப்பட்டனர்.
