ஆஸ்திரேலிய ஓபன் டென்னிஸ் - காஸ்பர் ரூட் அதிர்ச்சி தோல்வி

மெல்பர்ன்: ஆஸ்திரேலிய ஓபன் டென்னிஸ் தொடரில் ஆடவர் ஒற்றையர் பிரிவில் உலகத் தரவரிசையில் 3-வது இடத்தில் உள்ள நார்வே வீரர் காஸ்பர் ரூட் 2-வது சுற்றுடன் வெளியேறினார்.

ஆஸ்திரேலியாவின் மெல்பர்ன் நகரில் நடைபெற்று வரும் இந்தத் தொடரில் ஆடவர் ஒற்றையர் பிரிவு 2-வதுசுற்றில் உலகத் தரவரிசையில் 3-வது இடமும், போட்டித் தரவரிசையில் 2-வது இடமும் வகித்த நார்வேயின் காஸ்பர் ரூட், 48-ம் நிலை வீரரான அமெரிக்காவின் ஜென்சன் புரூக்ஸ்பியை எதிர்த்து விளையாடினார்.

3 மணி நேரம் 55 நிமிடங்கள் நடைபெற்ற இந்த ஆட்டத்தில் காஸ்பர் ரூடை 6-3, 7-5, 6-7 (4-7), 6-2 என்றசெட் கணக்கில் அதிர்ச்சி அளிக்கும் வகையில் வீழ்த்தினார் ஜென்சன் புரூக்ஸ்பி. நேற்று முன்தினம் முதல் நிலை வீரரான ஸ்பெயினின் ரபேல் நடால் 2-வது சுற்றுடன் வெளியேறிய நிலையில் தற்போது 3-ம் நிலை வீரரான காஸ்பர் ரூடும் நடையை கட்டி உள்ளார்.

8-ம் நிலை வீரரான அமெரிக்காவின் டெய்லர் ஃபிரிட்ஸ் 7-6 (7-4), 6-7 (2-7), 4-6, 7-6 (8-6), 2-6 என்ற செட் கணக்கில் 4 மணி நேரம் 2 நிமிடங்கள் போராடி தகுதி நிலை வீரரான ஆஸ்திரேலியாவின் அலெக்ஸி பாபிரினிடம் வீழ்ந்தார். இதேபோன்று 12-ம் நிலை வீரரான ஜெர்மனியின் அலெக்சாண்டர் ஜிவெரேவ், 23-ம் நிலை வீரரான அர்ஜெண்டினாவின் டியாகோ ஸ்வார்ட்ஸ்மேன் ஆகியோர் தங்களது 2-வது சுற்று ஆட்டங்களில் தோல்வி அடைந்து தொடரில் இருந்து வெளியேறினர்.

முன்னணி வீரர்கள் தோல்வி அடைந்து வெளியேறி வரும் நிலையில் தற்போது அனைவரின் எதிர்பார்ப்பும் செர்பியாவின் நோவக் ஜோகோவிச் மீது திரும்பி உள்ளது. ஜோகோவிச் தனது 2-வது சுற்றில் தகுதி நிலை வீரரான பிரான்ஸின் என்ஸோ குவாக்காடை 6-1, 6-7 (5-7), 6-2, 6-0 என்ற செட் கணக்கில் வீழ்த்தி 3-வது சுற்றுக்கு முன்னேறினார்.

5-ம் நிலை வீரரான ரஷ்யாவின் ஆந்த்ரே ரூப்லெவ் 6-2, 6-4, 6-7 (2-7), 6-3 என்ற செட் கணக்கில் பின்லாந்தின் எமில் ருசுவூரியையும், 9-ம் நிலைவீரரான டென்மார்க்கின் ஹோல்கர் ரூன் 7-5, 6-4, 6-4 என்ற நேர் செட்டில் அமெரிக்காவின் மாக்சிம்கிரெஸ்ஸியையும், 27-ம் நிலை வீரரான பல்கேரியாவின் கிரிகோர் மிடிட்ரோவ் 6-3, 6-2, 6-0 என்ற செட் கணக்கில் செர்பியாவின் லாஸ்லோ டிஜெரேவையும் வீழ்த்தி 3-வது சுற்றில் நுழைந்தனர்.

மகளிருக்கான ஒற்றையர் பிரிவு 2-வது சுற்றில் 5-ம் நிலை வீராங்கனையான பெல்லாரசின் சபலெங்கா, 53-ம் நிலை வீராங்கனையான அமெரிக்காவின் ஷெல்பி ரோஜர்ஸை எதிர்கொண்டார். இதில் சபலெங்கா 6-3, 6-1 என்ற நேர் செட்டில் வெற்றி பெற்று 3-வது சுற்றுக்கு முன்னேறினார். 4-ம் நிலை வீராங்கனையான பிரான்ஸின் கரோலின் கார்சியா 7-6 (7-5), 7-5 என்ற செட் கணக்கில் கனடாவின் லேலா பெர்னாண்டஸையும், 30-ம் நிலை வீராங்கனையான செக்குடியரசின் கரோலினா பிளிஸ்கோவா 6-0, 7-5 என்ற நேர் செட்டில் கஜகஸ்தானின் யூலியா புடின்ட்சேவாவையும் தோற்கடித்தனர்.

சானியா ஜோடி வெற்றி: மகளிர் இரட்டையர் பிரிவு முதல் சுற்றில்இந்தியாவின் சானியா மிர்சா, கஜகஸ்தானின் அனா டேனிலினா ஜோடியானது அமெரிக்காவின் பெர்னார்டா பெரா, ஹங்கேரியின் டால்மா கல்ஃபி ஜோடியை எதிர்த்து விளையாடியது. ஒரு மணி நேரம் 15 நிமிடங்கள் நடைபெற்ற இந்த ஆட்டத்தில் சானியா ஜோடி 6-2, 7-5 என்ற நேர் செட்டில் வெற்றி பெற்று 2-வது சுற்றுக்கு முன்னேறியது.