சின்னசாமி மைதானத்தில் இன்று பெங்களூரு- குஜராத் மோதல்

ஐபிஎல் தொடரில் இன்று மாலை 4 மணிக்கு பெங்களூரு சின்னசாமி மைதானத்தில் நடைபெறும் ஆட்டத்தில் பெங்களூரு ராயல் சாலஞ்சர்ஸ்-குஜராத் லயன்ஸ் அணிகள் மோதுகின்றன.

பெங்களூரு அணிக்கு இது 11-வது ஆட்டமாகும். அந்த அணி 4 வெற்றிகளுடன் புள்ளிகள் பட்டியலில் 6-வது இடத்தில் உள்ளது. பிளேப் ஆப் சுற்றுக்கு முன்னேற வேண்டுமானால் இன்றைய ஆட்டத்திலும் தனது கடைசி இரு ஆட்டங்களிலும் வென்றே ஆக வேண்டும் என்ற நெருக்கடியில் பெங்களூரு அணி உள்ளது.

மாறாக இன்றைய ஆட்டத்தில் தோல்வியை எதிர்கொண்டால் தொடரில் இருந்து பெங்களூரு அணி வெளியேறும் நிலை உருவாகும். இந்த தொடரில் 568 ரன்கள் குவித்துள்ள கேப்டன் விராட் கோலி கடந்த இரு ஆட்டத்திலும் பேட்டிங்கில் கைகொடுக்கத் தவறினார்.

டி வில்லியர்ஸ் ஓரளவு கை கொடுத்தாலும் அது வெற்றிக்கு உதவவில்லை. ரன் குவிக்க சிரமப்பட்டு வரும் கெய்ல் இன்றைய ஆட்டத்தில் நீக்கப்பட வாய்ப்புள்ளது. கோலியுடன் மீண்டும் கே.எல்.ராகுல் தொடக்க வீரராக களமிறங்கக்கூடும். பந்து வீச்சு வலுவிழந்து காணப்படுவதால் இன்றைய ஆட்டத்தில் கூடுதலாக 20 முதல் 30 ரன்கள் சேர்க்க பெங்களூரு அணி திட்டமிடக்கூடும்.

குஜராத் அணி 11 ஆட்டத்தில் 7 வெற்றிகளுடன் பட்டியலில் 2-வது இடத்தில் உள்ளது. இன்றைய ஆட்டத்தில் வெற்றி பெறும் பட்சத்தில் பிளே ஆப் சுற்றை உறுதி செய்துகொள்ளும். ரெய்னா தனது குழந்தை பிறப்பையொட்டி நெதர்லாந்து சென்றுள்ளதால் குஜராத் அணிக்கு இன்றைய ஆட்டத்தில் பிரண்டன் மெக்கலம் தலைமை வகிக்கிறார். ஐபிஎல் வரலாற்றில் ரெய்னா ஆட்டத்தை தவறவிடுவது இதுவே முதன்முறை.