ஆஸி. வேகப்பந்து வீச்சாளர் பீட்டர் சிடில் சர்வதேச கிரிக்கெட்டிலிருந்து ஓய்வு அறிவிப்பு

11 ஆண்டுகள் சர்வதேச கிரிக்கெட்டில் ஆடிய ஆஸ்திரேலிய வேகப்பந்து வீச்சாளர் பீட்டர் சிடில் சர்வதேச கிரிக்கெட்டிலிருந்து ஓய்வு பெறுவதாக அறிவித்துள்ளார்.

35 வயதாகும் பீட்டர் சிடில் 67 டெஸ்ட் போட்டிகளில் ஆடி 30.33 என்ற சராசரியில் 221 விக்கெட்டுகளைக் கைப்பற்றியுள்ளார், கடைசியாக நடந்த ஆஷஸ் தொடரில் பங்கேற்றார். 20 ஒருநாள் கிரிக்கெட் போட்டிகள் 2 டி20 சர்வதேச போட்டிகளில் அவர் ஆடியுள்ளார்.

67 டெஸ்ட் போட்டிகள் ஆஸ்திரேலியாவுக்காக ஆடியதில் பெருமை கொள்வதாகத் தெரிவித்த பீட்டர் சிடில், ஓய்வு பெறுவது சற்று வருத்தமாகவே உள்ளது என்றார்.

ஒரு முறை அவரது ஆரம்பக் கட்டத்தில் சிடில், கவுதம் கம்பீரின் ஹெல்மெட்டைத் தாக்கும் பந்தை வீசினார், 2008-ல் மொஹாலியில் தன் அறிமுகப் போட்டியில் சச்சின் டெண்டுல்கர் விக்கெட்டை முதல் விக்கெட்டாகக் கைப்பற்றினார்.

2010-ம் ஆண்டு பெர்த்தில் தன் பிறந்த தினத்தன்று இங்கிலாந்துக்கு எதிராக எடுத்த ஹாட்ரிக் சிடில் வாழ்க்கையில் மறக்க முடியாததாகும்.

பீட்டர் சிடில் என்றால் அவரது அயராத உழைப்பு, எப்போது அழைத்தாலும் அணிக்கு வந்து எந்த வித புகாரும் இல்லாமல் இறுக்கமாக வீசி ஒரு சில விக்கெட்டுகளை முக்கியக் கட்டத்தில் எடுத்துக் கொடுப்பவர், மிகவும் கட்டுக்கோப்பான வீச்சாளர் என்பதே நினைவுக்கு வரும்.