தேசிய மகளிர் ஹாக்கி: மார்ச் 13-ல் தொடக்கம்

32 அணிகள் பங்கேற்கும் 4-வது தேசிய மகளிர் ஹாக்கி சாம்பியன்ஷிப் போட்டி மத்தியப் பிரதேச தலைநகர் போபாலில் வரும் மார்ச் 13-ம் தேதி முதல் 23-ம் தேதி வரை நடைபெறுகிறது.

இந்தப் போட்டி லீக் மற்றும் நாக் அவுட் முறையில் நடைபெறுகிறது. மொத்தமுள்ள 32 அணிகளும் ஏ, பி என இரு டிவிசன்களாகப் பிரிக்கப்படுகின்றன. பி டிவிசன் போட்டிகள் 13-ம் தேதி முதல் 20-ம் தேதி வரையும், ஏ டிவிசன் போட்டிகள் 18-ம் தேதி முதல் 23-ம் தேதி வரையும் நடைபெறுகின்றன. ஒவ்வொரு டிவிசனில் உள்ள 16 அணிகளும் தலா 4 பிரிவுகளாகப் பிரிக்கப்படுகின்றன.

பி டிவிசனின் தொடக்க ஆட்டத்தில் அசாம் மற்றும் கோவா அணிகள் மோதுகின்றன. இறுதிப் போட்டி மார்ச் 20-ம் தேதி நடைபெறுகிறது. ஏ டிவிசனின் தொடக்க ஆட்டத்தில் ஹரியாணா மற்றும் ஒடிசா அணிகள் மோதுகின்றன. இறுதிப் போட்டி மார்ச் 23-ம் தேதி நடைபெறுகிறது.

இந்தப் போட்டியின்போது ஹாக்கி இந்தியா தேர்வுக் குழுவினர், அரசின் பார்வையாளர், பயற்சியாளர்கள் உள்ளிட்டோர் கலந்துகொண்டு ஆசிய விளையாட்டுப் போட்டி, காமன்வெல்த் போட்டி உள்ளிட்ட பெரிய போட்டிகளில் பங்கேற்கும் இந்திய அணிக்கு வீராங்கனைகளை தேர்வு செய்வார்கள் என எதிர்பார்க்கப்படுகிறது.