ஆஸ்திரேலிய அணி வெற்றி

இங்கிலாந்துக்கு எதிரான 4-வது ஒருநாள் போட்டியில் ஆஸ்திரேலிய அணி 3 விக்கெட்கள் வித்தியாசத்தில் வெற்றி பெற்றது.

அடிலெய்டில் நேற்று நடைபெற்ற இந்த ஆட்டத்தில் முதலில் பேட் செய்த இங்கிலாந்து அணி 44.5 ஓவர்களில் 196 ரன்களுக்கு அனைத்து விக்கெட்களையும் இழந்தது. ஜோஸ் ஹசல்வுட், பாட் கம்மின்ஸ் வேகக்கூட்டணி இங்கிலாந்து டாப் ஆர்டரை நிலைகுலையச் செய்தது. ஜேசன் ராய் 0, ஜானி பேர்ஸ்டோவ் 0, அலெக்ஸ் ஹேல்ஸ் 3, ஜோ ரூட் 0, ஜாஸ் பட்லர் 0 ரன்களில் வெளியேற 6.2 ஓவர்களில் வெறும் 8 ரன்களுக்கு 5 விக்கெட்களை இழந்து இங்கிலாந்து அணி கடும் பின்னடைவை சந்தித்தது.

6-வது விக்கெட்டுக்கு இணைந்த கேப்டன் மோர்கனுடன் இணைந்த மொயின் அலி அணியை சரிவில் இருந்து மீட்க போராடினார். இந்த சிறிது நேரம் தாக்குப்பிடித்து விளையாடியது. மோர்கன் 33 ரன்களில் கம்மின்ஸ் பந்திலும், மொயின் அலி 33 ரன்களில் ஆன்ட்ரூ டை பந்திலும் ஆட்டமிழந்தனர். அடுத்து களமிறங்கிய அடில் ரஷித் 7 ரன்களில் வெளியேறினார்.

120 ரன்களுக்கு 8 விக்கெட்கள் சரிந்த நிலையில் கிறிஸ் வோக்ஸ், டாம் குர்ரன் ஜோடி அதிரடியாக விளையாடியது. கிறிஸ்வோக்ஸ் 82 பந்துகளில், 5 சிக்ஸர்கள், 4 பவுண்டரிகளுடன் 78 ரன்களும், குர்ரன் 35 ரன்களும் சேர்த்ததால் இங்கிலாந்து அணியால் சற்று கவுரவமான ஸ்கோரை எட்ட முடிந்தது.

ஆஸ்திரேலிய அணி தரப்பில் கம்மின்ஸ் 4 விக்கெட்களும் ஹசல்வுட், ஆன்ட் ரூ டை ஆகியோர் தலா 3 விக்கெட்களும் கைப்பற்றினர். 197 ரன்கள் இலக்குடன் பேட் செய்த ஆஸ்திரேலிய அணி 37 ஓவர்களில் 7 விக்கெட்களை இழந்து வெற்றி பெற்றது. தொடக்க வீரரான டிரெவிஸ் ஹெட் 107 பந்துகளில், 15 பவுண்டரிகளுடன் 96 ரன்கள் விளாசினார்.

5 ஒருநாள் போட்டிகள் கொண்ட இந்தத் தொடரில் இங்கிலாந்து அணி ஏற்கெனவே முதல் 3 ஆட்டங்களிலும் வெற்றி பெற்று தொடரை கைப்பற்றியிருந்தது. இதனால் அந்த அணி தொடரில் 3-1 என முன்னிலை வகிக்கிறது. கடைசி ஒருநாள் போட்டி நாளை பெர்த்தில் நடைபெறுகிறது.