காயத்தால் ஸ்டார்க் அவதி

ஆஷஸ் டெஸ்ட் தொடரின் 4-வது ஆட்டத்தில் ஆஸ்திரேலிய வேகப்பந்து வீச்சாளர் மிட்செல் ஸ்டார்க் விளையாடுவது சந்தேகம் என தகவல்கள் வெளியாகி உள்ளது.

இங்கிலாந்து அணிக்கு எதிராக ஆஷஸ் டெஸ்ட் தொடரின் முதல் 3 ஆட்டங்களிலும் வெற்றி பெற்ற ஆஸ்திரேலிய அணி தொடரை 3-0 என கைப்பற்றியுள்ளது. இந்த தொடரின் 4-வது ஆட்டம் வரும் 26-ம் தேதி மெல்போர்னில் தொடங்குகிறது. பாக்சிங் டே டெஸ்ட் என அழைக்கப்படும் இந்த ஆட்டத்தில் ஆஸ்திரேலிய அணியின் வேகப்பந்து வீச்சாளரான மிட்செல் ஸ்டார்க் விளையாடுவது கேள்விக்குறியாகி உள்ளது.

பெர்த்தில் நடைபெற்ற 3-வது டெஸ்ட் போட்டியில் 4-வது நாள் ஆட்டத்தின் போது மிட்செல் ஸ்டார்க் காயம் அடைந்துள்ளார். இந்நிலையில் அவருக்கு நேற்று ஸ்கேன் எடுத்து பார்க்கப்பட்டது.

இதில் அவரது வலது குதிகாலில் சிராய்ப்பு இருப்பது தெரியவந்துள்ளது. இதனால் அவர், மெல்போர்ன் டெஸ்ட்டில் களமிறங்குவது சந்தேகம் என்றே கருதப்படுகிறது. அவர் விளையாட முடியாத சூழ்நிலை ஏற்பட்டால் ஜேக்சன் பேர்டுக்கு வாய்ப்பு கிடைக்கக்கூடும். - பிடிஐ