திருப்பதி: திருப்பதி ஏழுமலையான் கோயில் நவராத்திரி பிரம்மோற்சவ விழா இன்று தொடங்கி, வரும் 20-ம் தேதி சக்கர ஸ்நானம் வரை கோலாகலமாக நடைபெற உள்ளது. திருப்பதி ஏழுமலையான் கோயில் நவராத்திரி பிரம்மோற்சவ விழா இன்று (திங்கள்கிழமை) தொடங்குகிறது. இதையொட்டி நேற்று அங்குரார்பண நிகழ்ச்சிகள் ஆகம விதிகளின்படி நடைபெற்றது. நேற்றிரவு விஸ்வக்சேனரின் மாட வீதி உலா நடைபெற்றது.
அதனை தொடர்ந்து பிரம்மோற்சவ விழாவின் முதல் நாளான இன்றிரவு பெரிய சேஷ வாகனத்தில் ஸ்ரீதேவி, பூதேவி சமேதமாக மலையப்பர் பவனி வந்து பக்தர்களுக்கு அருள் பாலிப்பார். 2-ம் நாள் காலை சின்ன சேஷ வாகனம், இரவு அன்ன வாகன சேவை; 3-ம் நாள் காலை சிம்ம வாகனம், இரவு முத்து பல்லக்கு வாகனம்; 4-ம் நாள் காலை கற்பக விருட்ச வாகனம், இரவு சர்வ பூபால வாகனம், 5-ம் நாள் காலை மோகினி அலங்காரம், இரவு கருட வாகன சேவை நடைபெறும்.
அதைத் தொடர்ந்து, 6-ம் நாள் காலை அனுமன் வாகனம், மாலை புஷ்பக விமான ஊர்வலம், இரவு கஜ வாகன சேவை; 7-ம் நாள் காலை சூரிய பிரபை, இரவு சந்திர பிரபை; 8-ம் நாள் காலை தங்க தேரோட்டம், இரவு குதிரை வாகன சேவை நடைபெறும். இறுதியாக 9-ம் நாள் காலை 6 மணி முதல் 9 மணி வரை சக்கர ஸ்நான நிகழ்ச்சியுடன் நவராத்திரி பிரம்மோற்சவம் நிறைவடைகிறது.
