புதுடெல்லி: டிசிஎஸ், டாடா மோட்டார்ஸ், டைட்டன் உள்ளிட்ட டாடா குழும நிறுவனங்களை கட்டுப்படுத்தும் டாடா சன்ஸ் நிர்வாகத் தலைவர் என்.சந்திரசேகரனின் பதவிக்காலம் அடுத்த ஆண்டு பிப்ரவரியில் முடிவடைகிறது. இதையடுத்து, 5 பேர் அடங்கிய குழு அவரை அப்பதவிக்கு மீண்டும் நியமிக்க பெரும்பான்மை அடிப்படையில் ஒப்புதல் வழங்கியது.
இதற்கு அக்குழுவில் இடம்பெற்றுள்ள நோயல் டாடா மட்டும் எதிர்ப்பு தெரிவித்தார். இந்த விவகாரத்தை சட்ட ரீதியாக அணுகப் போவதாக அவர் கூறியுள்ளார்.
இதுகுறித்து மக்களவை எதிர்க்கட்சித் தலைவர் ராகுல் காந்தி கூறியிருப்பதாவது: டாடா சன்ஸ் குழுமம் சட்டவிரோதமாக அழிக்கப்பட்டு வருகிறது. ஆனால் எந்த வணிகத் தலைவரும் இதுபற்றி ஒரு வார்த்தைகூட பேசத் துணியவில்லை.
நீங்கள் எவ்வளவு காலம் மவுனமாக இருக்கப் போகிறீர்கள்? அவர்கள் உங்களை முழுமையாக சொந்தமாக்கிக் கொள்ளும் வரையிலா? இந்திய வணிகம் என்பது மோடி மற்றும் அமித் ஷாவின் விளையாட்டுப்பொருள் அல்ல. உங்களுக்கு துணிச்சல் இல்லை. ஆனால் எங்களிடம் உள்ளது. இந்தக் குற்றங்களுக்கு நீதி கிடைப்பதை நாங்கள் உறுதி செய்வோம். இவ்வாறு அவர் கூறியுள்ளார்.
