டெல்லியில் நேற்று நடைபெற்ற நிகழ்ச்சியில் பாஜகவில் இணைந்த டென்னிஸ் நட்சத்திரம் லியாண்டர் பயஸுக்கு இனிப்பு ஊட்டுகிறார் மத்திய அமைச்சர் கிரண் ரிஜிஜு. உடன் பாஜக எம்.பி. அனில் பலுனி. படம்: பிடிஐ
புதுடெல்லி: திரிணமூல் காங்கிரஸ் கட்சியிலிருந்து விலகிய டென்னிஸ் முன்னாள் வீரர் லியாண்டர் பயஸ் பாஜகவில் இணைந்துள்ளார்.
கடந்த 2021 அக்டோபரில் கோவாவில் நடைபெற்ற நிகழ்ச்சியில், டென்னிஸ் ஜாம்பவான் லியாண்டர் பயஸ், மேற்கு வங்க முதல்வர் மம்தா பானர்ஜி முன்னிலையில் திரிணமூல் காங்கிரஸ் கட்சியில் இணைந்தார்.
இந்நிலையில், 5 ஆண்டுகளுக்குப் பிறகு திரிணமூல் காங்கிரஸ் கட்சியிலிருந்து லியாண்டர் பயஸ் அண்மையில் விலகினார். இந்நிலையில், டெல்லியில் உள்ள பாஜக தலைமையகத்தில் நேற்று நடைபெற்ற நிகழ்ச்சியில் லியாண்டர் பயஸ் பாரதிய ஜனதா கட்சியில் இணைந்தார்.
இதுகுறித்து அவர் கூறும்போது, “இது என் வாழ்வின் ஒரு முக்கியமான நாள். பிரதமர் நரேந்திர மோடி, மத்திய அமைச்சர் அமித் ஷா மற்றும் பாஜக தேசிய தலைவர் நிதின் நபின் ஆகியோருக்கு நன்றியைத் தெரிவித்துக் கொள்கிறேன். நாட்டின் இளைஞர்களுக்கும் மக்களுக்கும் சேவை செய்ய பாஜக எனக்கு ஒரு வாய்ப்பளித்துள்ளது. பாஜகவின் உறுப்பினர் என்பது என் மீதான ஒரு பொறுப்பு” என்றார்.
கொல்கத்தாவில் பிறந்த லியாண்டர் பயஸ், தற்போது அவரது தந்தை வீஸ் பயஸ் பிறந்த இடமான கோவாவில் வசித்து வருகிறார். மேற்கு வங்கத்தில் இன்னும் சில வாரங்களில் தேர்தல் நடைபெறவுள்ள நிலையிலும், அடுத்த ஆண்டு கோவா சட்டப்பேரவை தேர்தல் வரவுள்ள நிலையிலும், லியாண்டர் பயஸின் புதிய அரசியல் பயணம் அனைவரின் கவனத்தையும் ஈர்த்துள்ளது.
