சித்தராமையா
பெங்களூரு: கர்நாடகாவை அதிக நாட்கள் ஆட்சி செய்த முதல்வர் என்ற சாதனையை சித்தராமையா படைத்துள்ளார். இதன் மூலம் முன்னாள் முதல்வர் தேவராஜ் அர்ஸின் சாதனையை அவர் முறியடித்துள்ளார்.
கடந்த 35 ஆண்டுகளாக கர்நாடக மாநிலத்தின் வரலாற்றில் அதிக நாட்கள் முதல்வராக ஆட்சி செய்தவர் என்ற பட்டியலில் தேவராஜ் அர்ஸ் முதலிடத்தில் இருந்தார். அவர் 1972, 1978 ஆகிய ஆண்டுகளில் நடந்த தேர்தல்களில் தொடர்ச்சியாக வென்று 2,789 நாட்கள் (7 ஆண்டுகள் 6 மாதங்கள்) முதல்வராக பதவி வகித்தார். அவருக்கு அடுத்த இடத்தில் நிஜலிங்கப்பா 7 ஆண்டுகள் 175 நாட்கள் முதல்வராக இருந்தார்.
இந்நிலையில், தற்போதைய முதல்வர் சித்தராமையா ஜனவரி 6ம் (இன்று) தேதியுடன் தேவராஜ் அர்ஸ் பதவியில் இருந்த நாட்களை சமன் செய்கிறார். ஜனவரி 7-ம் தேதியுடன், அதிக நாட்கள் கர்நாடகாவை ஆண்ட முதல்வர் என்ற தேவராஜ் அர்ஸின் சாதனையை முறியடிக்கிறார். ஜனவரி 7-ம் தேதிக்கு பின்னர் அதிக நாட்கள் கர்நாடகாவை ஆட்சி செய்த முதல்வர் என்ற பெருமை சித்தராமையாவை வந்தடையும்.
