புதுடெல்லி: எஸ்ஐஆர் நடவடிக்கையில் முறைகேடுகள் நடந்ததாகக் கூறி, தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தி காங்கிரஸ் உள்ளிட்ட இண்டியா கூட்டணிக் கட்சிகள், கரப்பான் பூச்சி ஜனதா கட்சி (சிஜேபி) மற்றும் அகில இந்திய மாணவர் சங்கம் (ஏஐஎஸ்ஏ) உள்ளிட்ட மாணவர் அமைப்புகள் டெல்லியில் தொடர் போராட்டத்தில் ஈடுபட்டு வருகின்றன.
இதில், சிபிஐ (எம்எல்) கட்சியின் மாணவர் அமைப்பான ஏஐஎஸ்ஏ சார்பில் அதன் தேசிய தலைவர் நேஹா போரா அதிக கவனத்தைப் பெற்று வருகிறார். மக்களவை எதிர்க்கட்சி தலைவரான ராகுல் காந்தி போராட்டம் தொடர்பான தனது நிகழ்வுகளில் நேஹா போராவுக்கு முக்கியத்துவம் அளித்து வருகிறார் என்றும் அதேபோல காங்கிரஸ் பொதுச் செயலாளர் பிரியங்கா காந்தியும் போராட்டத்தின்போது நேஹாவை தனக்கு அருகே வைத்துக் கொள்கிறார் என்றும் காங்கிரஸ் மாணவர் அமைப்பினர் குற்றம்சாட்டியுள்ளனர்.
கடந்த 12-ம் தேதி நடந்த பேரணிக்கு தலைமை தாங்கிய இரு பெண்களில் ஒருவர் பிரியங்கா காந்தி, மற்றொருவர் நேஹா போரா. போராட்டத்தின் முன்னணித் தலைவர்கள் பயணித்த பேருந்திலும், பின்னர் ராகுல் காந்தியும் சில முக்கிய நபர்களும் நின்றிருந்த வாகனத்திலும் நேஹா போரா காணப்பட்டார்.
போராட்டக்களத்தில் காங்கிரஸின் மாணவர் அமைப்பான இந்திய தேசிய மாணவர் சங்கத்தின் (என்எஸ்யுஐ) தேசியத் தலைவர் வினோத் ஜாகர் உள்ளிட்ட முக்கிய நிர்வாகிகள் இருந்தாலும், அவர்கள் முன்வரிசையில் நிறுத்தப்படவில்லை. எதிர்க்கட்சித் தலைவர்களின் செய்தியாளர் கூட்டத்திலும் அவர்களுக்கு இணையாக நேஹாவுக்கும் பேசும் வாய்ப்பு அளிக்கப்படுகிறது.
இதுபோன்ற நடவடிக்கை என்எஸ்யுஐ அமைப்பினருக்கு கடும் அதிருப்தியை ஏற்படுத்தி உள்ளது. அந்த அமைப்பினர் சார்பில் நடத்தப்படும் வாட்ஸ்அப் குழுக்களில் பலரும் இதை குறிப்பிட்டு புகார் தெரிவித்ததாக கூறப்படுகிறது.
