பெங்களூரு: கர்நாடக முதல்வர் டி.கே.சிவகுமார் தலைமையிலான அமைச்சரவையில் இருந்து, திட்டம் மற்றும் புள்ளியியல் துறை அமைச்சராகப் பொறுப்பேற்ற 25 நாட்களிலேயே பி. நாகேந்திரா தனது பதவியை ராஜினாமா செய்துள்ளார். வால்மீகி வளர்ச்சி வாரிய நிதி முறைகேடு தொடர்பாக பாஜக உள்ளிட்ட எதிர்க்கட்சிகள் தொடர் போராட்டம் நடத்தி வந்த நிலையில், இந்த முடிவை அவர் எடுக்கப்பட்டுள்ளார்.
செய்தியாளர்களைச் சந்தித்த நாகேந்திரா, கண்ணீர் விட்டு அழுதபடி பேசுகையில், “கட்சிக்குத் தேவையில்லாத சங்கடங்களை உருவாக்கக் கூடாது என்பதற்காகவே நான் விருப்பப்பட்டு எனது அமைச்சர் பதவியை ராஜினாமா செய்கிறேன். பழங்குடியினத்தைச் சேர்ந்த ஒருவன் உயர் நிலைக்கு வருவதை விரும்பாத சிலர் என்னை குறி வைத்துள்ளனர்.
வால்மீகி வாரிய பணப் பரிவர்த்தனையில் எங்கேனும் எனது கையெழுத்து இருக்கிறதா? தலித் சமூகத்தைச் சேர்ந்தவன் என்பதால் மட்டுமே என் மீது பழி சுமத்தப்படுகிறது. வங்கிகள் சம்பந்தப்பட்ட பரிவர்த்தனைக்கு நான் எவ்வாறு பொறுப்பாவேன்? அப்படியென்றால் மத்திய நிதி அமைச்சர்தான் இதற்குப் பொறுப்பா?" என்று அடுக்கடுக்கான கேள்விகளை எழுப்பினார்.
கடந்த 2024 மே மாதம் வால்மீகி பழங்குடியினர் மேம்பாட்டு வாரியத்தின் கணக்கு கண்காணிப்பாளர் சந்திரசேகரன் தற்கொலை செய்துகொண்டதை அடுத்து, ரூ.89.63 கோடி நிதி முறைகேடு வெளிச்சத்துக்கு வந்தது. அப்போது பழங்குடியின நலத்துறை அமைச்சராக இருந்த நாகேந்திரா 2024 ஜூன் மாதம் தனது பதவியை ராஜினாமா செய்தார்.
பின்னர் டி.கே.சிவகுமார் முதல்வராகப் பொறுப்பேற்றதைத் தொடர்ந்து, கடந்த ஆகஸ்ட் 3-ம் தேதி நாகேந்திரா மீண்டும் அமைச்சராக பொறுப்பேற்றார். இதற்கு எதிர்ப்பு தெரிவித்து எதிர்க்கட்சிகள் சட்டமன்றத்திற்கு உள்ளேயும் வெளியேயும் தொடர் போராட்டங்களை நடத்தி வந்தன.
நாகேந்திராவின் ராஜினாமா குறித்து கருத்து தெரிவித்துள்ள முதல்வர் டி.கே.சிவகுமார், "அரசு எதிர்க்கட்சிகளின் அழுத்தத்துக்கு பணியவில்லை. நாகேந்திரா ஒரு குற்றமும் செய்யாதவர். கட்சியின் நலனைக் கருத்தில் கொண்டு சுய விருப்பத்தின் பேரிலேயே அவர் இமுடிவை எடுத்துள்ளார்" எனக் கூறியுள்ளார்.
