

புதுடெல்லி: பிரதமர் மோடியை புகழ்ந்து பேசியதற்காக சாம் பிட்ரோடாவை பதவியிலிருந்து நீக்க வேண்டும் என்று கோரிக்கை எழுந்துள்ளது. அயலக இந்திய காங்கிரஸ் தலைவர் சாம் பிட்ரோடா, “பிரதமர் நரேந்திர மோடி தனிப்பட்ட முறையில் அன்பானவர், கருணைமிக்கவர், அக்கறையுள்ள மனிதர்” என்று சமீபத்தில் பாராட்டிப் பேசியிருந்தார்.
இந்நிலையில், அயலக இந்திய காங்கிரஸ் துணைத் தலைவர் ஜார்ஜ் ஆப்ரகாமும், கனடாவைச் சேர்ந்த அந்த அமைப்பின் செயல்பாட்டாளர் தேவான்ஷு நரங்கும் பிட்ரோடாவுக்கு எதிராகக் குரல் எழுப்பியுள்ளனர். தேவான்ஷு நரங், காங்கிரஸ் தலைவர் மல்லிகார்ஜுன கார்கேவுக்கு எழுதியுள்ள கடிதத்தில், ``பிட்ரோடாவின் பேச்சு வெட்கக்கேடானது.
அவரை உடனடியாகப் பதவியிலிருந்து நீக்க வேண்டும்'' என்றும் வலியுறுத்தியுள்ளார். பிட்ரோடாவுக்கு ஜார்ஜ் ஆப்ரகாம் அனுப்பியுள்ள மின்னஞ்சலில், “பிரதமர் மோடிக்கு ஆதரவு அதிகம் உள்ள வெளிநாடுவாழ் இந்தியர்களிடம், மதச்சார்பின்மை, ஜனநாயகம், சிறுபான்மையினர் உரிமைகள் பற்றிப் பேசுவதே கடினமாக உள்ளநிலையில், தாங்கள் மோடியின் தனிப்பட்ட குணங்களைப் பொதுவெளியில் இவ்வளவு புகழ்ந்தால், தனிப்பட்ட நட்புக்கும் அரசியல் ஆதரவுக்கும் உள்ள வேறுபாடு பலருக்குப் புரியாமல் போகலாம்” என்று குறிப்பிட்டுள்ளார்.