புதுடெல்லி: இந்தியாவில் பெண்களுக்கு ஏற்படும் புற்றுநோய்களில், மார்பகப் புற்றுநோய்க்கு அடுத்தபடியாக கருப்பை வாய்ப் புற்றுநோய் உள்ளது. இது எச்பிவி (Human Papilloma virus) எனப்படும் தொற்றால் ஏற்படுகிறது. இதை ஆரம்ப நிலையிலேயே தடுக்க, சிறுமிகளுக்கு தடுப்பூசி போடுவது அவசியம்.
இதனை கருத்தில் கொண்டு, கடந்த பிப்ரவரி மாதம் நாடு தழுவிய இலவச எச்பிவி தடுப்பூசி திட்டத்தை பிரதமர் நரேந்திர மோடி தொடங்கி வைத்தார். இதன்படி பெற்றோர் சம்மதத்துடன் 14 வயது சிறுமிகளுக்கு அரசு சுகாதார நிலையங்களில் இலவசமாக ஒற்றை டோஸ் எச்பிவி தடுப்பூசி வழங்கப்படுகிறது. தடுப்பூசி முன்பதிவு மற்றும் கண்காணிப்புப் பணிகள் ‘யு-வின்’ டிஜிட்டல் தளம் மூலம் மேற்கொள்ளப்படுகின்றன.
இது தொடர்பாக மத்திய சுகாதார அமைச்சகம் வெளியிட்டுள்ள அறிக்கையில், “கருப்பை வாய்ப் புற்றுநோயைத் தடுப்பதற்கான முயற்சிகளில் இந்தியா ஒரு முக்கிய மைல்கல்லை எட்டியுள்ளது. இந்த நோயை ஏற்படுத்தக்கூடிய எச்பிவி தொற்றுகளிலிருந்து சிறுமிகளை பாதுகாப்பதில் இந்தச் சாதனை ஒரு குறிப்பிடத்தக்க படியாகும்.
மேலும், இது நாடு முழுவதும் தடுப்பு சுகாதார சேவைகளின் பரவல் அதிகரித்து வருவதையும் பிரதிபலிக்கிறது. சுமார் 1.2 கோடி சிறுமிகளை இலக்காகக் கொண்ட இந்த இயக்கம், 9 மாதங்களிலேயே ஒரு கோடி சிறுமிகளுக்கு எச்பிவி தடுப்பூசி செலுத்தியுள்ளது.
மாநில அளவிலான செயல்பாடுகளில் குஜராத், உத்தர பிரதேசம், ஆந்திரா, மிசோரம், மத்திய பிரதேசம் மற்றும் பிஹார் ஆகிய 6 மாநிலங்கள் 100 சதவீத இலக்கை எட்டியுள்ளன. அசாம் (95.63%), தெலங்கானா (95.28%), கர்நாடகா (93.16%) மற்றும் உத்தராகண்ட் (90.17%) ஆகிய மாநிலங்களும் முன்னிலையில் உள்ளன. தடுப்பூசி செலுத்தப்பட்டவர்களின் மொத்த எண்ணிக்கையில் உத்தரப் பிரதேசம் (29.33 லட்சம்) முதலிடத்திலும், பிஹார் (13.70 லட்சம்) மற்றும் குஜராத் (7.75 லட்சம்) ஆகிய மாநிலங்கள் அடுத்தடுத்த இடங்களிலும் உள்ளன” என தெரிவிக்கப்பட்டுள்ளது.