புதுடெல்லி: விமானப்படை தினத்தை முன்னிட்டு நேற்று நடைபெற்ற செய்தியாளர் சந்திப்பில் விமானப்படை தளபதி ஏர் சீஃப் மார்ஷல் ஏ.பி. சிங் பேசியதாவது:
பிரான்ஸிடம் இருந்து மேலும் 114 ரஃபேல் போர் விமானங்களை வாங்குவதற்கான பல்நோக்கு போர் விமானத் திட்டம் தொடர்பான பேச்சுவார்த்தை தொடர்ந்து நடைபெற்று வருகின்றன.
விலை நிர்ணயம் உள்ளிட்ட முக்கிய அம்சங்கள் குறித்து தற்போது விவாதிக்கப்பட்டு வருகின்றன. அனைத்தும் திட்டமிட்டபடி நடைபெற்றால், நடப்பு நிதியாண்டின் இறுதிக்குள் (மார்ச் 27) இந்த ஒப்பந்தத்தை இறுதி செய்ய முடியும்.
இந்திய விமானப்படையில் போர் விமானப் படைப்பிரிவுகளின் பலத்தை அதிகரிக்க அடுத்த சில ஆண்டுகளில் ஆண்டுதோறும் 36 முதல் 40 போர் விமானங்களை விமானப்படையில் சேர்க்க வேண்டிய தேவை உள்ளது.
சுமார் 20 ஆண்டுகளாக நிலுவையில் இருந்த 114 ரஃபேல் விமானக் கொள்முதல் திட்டத்துக்கு இந்த ஆண்டு பிப்ரவரியில் முதல்கட்ட ஒப்புதல் கிடைத்தது. பிரான்ஸ் அரசுடன் நேரடி ஒப்பந்தம் மூலம் இது மேற்கொள்ளப்பட உள்ளது. இந்திய விமானப்படையிடம் ஏற்கெனவே 36 ரஃபேல் விமானங்கள் உள்ளன.
புதிய 114 விமானங்களும் சேர்ந்தால், மொத்த ரஃபேல் விமானங்கள் எண்ணிக்கை 150 ஆக உயரும். இவ்வாறு அவர் கூறினார்.
