ரபேல் விமானத்துக்கு பூஜை விவகாரம்: போபர்ஸ் ஊழலை ஞாபகப்படுத்தியதற்கு நன்றி: காங்கிரஸுக்கு பாஜக பதில்

புதுடெல்லி

ரபேல் விமானத்துக்கு பூஜை செய்ததை விமர்சித்த காங்கிரஸுக்கு பாஜக பதில் அளித்துள்ளது.

இந்திய விமானப்படைக்கு, 36 ரபேல் போர் விமானங்கள் வாங்க, பிரான்ஸ் நாட்டுடன், 2016 செப்டம்பர் மாதத்தில், 58 ஆயிரம் கோடி ரூபாய் மதிப்புள்ள ஒப்பந்தம் செய்யப்பட்டது.

4 ரஃபேல் விமானங்கள் கொண்ட முதல் பேட்ச் 2020-ல் இந்தியாவுக்கு வந்து சேரும். அனைத்து 36 ரஃபேல் போர் விமானங்களும் செப்.2022 வாக்கில் இந்தியாவுக்கு வந்து சேரும் என்று எதிர்பார்க்கப்படுகிறது.

அதன்படி, பிரான்ஸ் நாட்டின், 'டசால்ட் ஏவியேஷன்' நிறுவனம் தயாரிக்கும் இந்த போர் விமானத்தின், முதல் விமானம் நேற்று ஒப்படைக்கப்பட்டது.

இதற்காக, மத்திய பாதுகாப்புத்துறை அமைச்சர் ராஜ்நாத் சிங், பிரான்ஸ் சென்றார். அந்நாட்டு அதிபர் இம்மானுவேல் மேக்ரானை சந்தித்த ராஜ்நாத் பின்னர், ரபேல் போர் விமானங்கள் தயாரிக்கப்படும் தொழிற்சாலைக்கு சென்றார்.

பின்னர் முதல் விமானத்தை, பிரான்ஸில் ராஜ்நாத் சிங் பெற்று கொண்டார். முன்னதாக ரபேல் விமானத்திற்கு ராஜ்நாத் சிங்சாஸ்த்ர பூஜை நடத்தினார். ரபேல் விமானத்திற்கு சந்தனப் பொட்டு வைத்து, முன் பகுதியில் தேங்காய், பூக்கள் வைத்து, ஓம் என்று ஹிந்தியில் ராஜ்நாத் சிங் எழுதினார்.

ரபேல் விமானத்துக்கு கயிறு கட்டிய பின், டயருக்கு அடியில் எலுமிச்சை பழம் வைத்து பூஜை செய்யப்பட்டது. இதற்கு காங்கிரஸ் கடும் கண்டனம் தெரிவித்துள்ளது.

இதுகுறித்து காங்கிரஸ் மூத்த தலைவர் மல்லிகார்ஜூன கார்கே கூறுகையில் ‘‘ரபேல் விமானத்தை வைத்து மத்திய அரசு நாடகம் நடத்துகிறது. இதுபோன்ற தமாசு தேவையில்லை. போபர்ஸ் போன்ற பீரங்கிகள் காங்கிரஸ் ஆட்சிக்காலத்தில் வாங்கப்பட்டுள்ளன. ஆனால் இதுபோன்ற நேரில் சென்று அமைச்சர்கள் வாங்கியதில்லை. இதுபோன்ற பூஜை எதுவும் செய்ததில்லை’’ என மல்லிகார்ஜூன கார்கே கூறினார்.

இந்தநிலையில் காங்கிரஸுக்கு பாஜக பதிலடி கொடுத்துள்ளது. ஹரியாணா மாநில சட்டப்பேரவைத் தேர்தலையொட்டி ஹர்தாலில் இன்று நடைபெற்ற தேர்தல் பிரச்சாரக் கூட்டத்தில் கலந்து கொண்டு பேசிய பாஜக தலைவர் அமித் ஷா, இந்த விவகாரம் குறித்து பேசினார்.

அவர் பேசுகையில் ‘‘விஜயதசமி திருநாளில் சாஸ்த்ர பூஜை செய்வதை காங்கிரஸ் விரும்பவில்லை. ஏனெனில் இந்தியாவின்பழக்க வழக்கங்கள், பண்பாடு எதுவுமே காங்கிரஸுக்கு பிடிக்காது. எதை விமர்சிக்க வேண்டும், எதை எதிர்க்க வேண்டும் என்பதை உணர்ந்து காங்கிரஸ் நிர்வாகிகள் பேச வேண்டும். இந்திய விமானப்படையை நவீனமாக்குவதையும் காங்கிரஸ் விரும்பவில்லை; இந்திய பண்பாட்டை பின்பற்றுவதையும் அக்கட்சி விரும்பவில்லை’’ எனக் கூறினார்.

இதனிடையே பாஜக அதிகாரபூர்வ ட்விட்டர் பக்கத்தில் ‘‘குவாட்ரோச்சியை வழிபடும் கட்சியினருக்கு சாஸ்த்ர பூஜை இயற்கையாகவே பிரச்சினையாக தான் இருக்கும் ’’ எனக் தெரிவிக்கப்பட்டுள்ளது.