சந்திரயான்-2: விக்ரம் லேண்டருடன் தொடர்பை ஏற்படுத்த தொடர்ந்து முயற்சி: இஸ்ரோ விளக்கம்

பெங்களூரு
சந்திரயான்- 2 விண்கலத்தின் விக்ரம் லேண்டருடன் இன்னமும் தொடர்பை ஏற்படுத்த முடியவில்லை. விக்ரம் லேண்டரை தொடர்பு கொள்ள தொடர்ந்து முயன்று கொண்டு இருக்கிறோம் என இஸ்ரோ விளக்கம் அளித்துள்ளது.
சந்திரயான் - 2 விண்கலத்தின், 'லேண்டர்' சாதனம், நிலவில் தரையிறங்கும் சரித்திர முக்கியத்துவம் வாய்ந்த நிகழ்வை காண,கர்நாடக மாநிலம், பெங்களூரு பீன்யாவிலுள்ள, 'இஸ்ரோ' கண்காணிப்பு மையத்தில் விரிவான ஏற்பாடு செய்யப்பட்டிருந்தது. இதை காண்பதற்காக, பிரதமர் நரேந்திர மோடி, பெங்களூரு வந்தார்.
அவருடன், நாட்டின் பல்வேறு பகுதிகளைச் சேர்ந்த, 60 மாணவ - மாணவியரும் பெங்களூரு வந்தனர். சந்திரயான் - 2' விண்கலத்தின், 'லேண்டர்' சாதனம், செப்டம்பர் 7-ம் தேதி அதிகாலை, தரையிறங்கும் முன்பாக திடீரென லேண்டருடனான தொடர்பு திடீரென துண்டிக்கப்பட்டது.
இந்தநிலையில் நேற்று இஸ்ரோ தலைவர் சிவன் ‘‘சந்திரயான் 2 விண்கலத்தின் லேண்டர் விக்ரம் கண்டுபிடிக்கப்பட்டது. லேண்டரின் தகவல் துண்டிக்கப்பட்ட நிலையில், ஆர்ப்பிட்டர் எடுத்த புகைப்படத்தில் லேண்டர் விக்ரம் இருப்பது தெரியவந்துள்ளது.
ஆனாலும், இன்னும் லேண்டருடனான தொடர்பு ஏற்படுத்தப்படவில்லை . தொடர்ந்து லேண்டருடன் தொடர்பை மீட்க முயற்சிகள் மேற்கொள்ளப்பட்டு வருகின்றன’’ என அறிவித்தார்.
எனினும் லேண்டரில் இருந்து சிக்னல் பெறும் முயற்சியில் இஸ்ரோ விஞ்ஞானிகள் தொடர்ந்து ஈடுபட்டுள்ளனர்.
இந்தநிலையில் இஸ்ரோ ட்விட்டர் பக்கத்தில் கூறப்பட்டுள்ளதாவது:
சந்திரயான்-2 விண்கலத்தின் ஆர்பிட்டர் விக்ரம் லேண்டரை கண்டறிந்துள்ளது. விக்ரம் லேண்டருடன் இன்னமும் தொடர்பை ஏற்படுத்த முடியவில்லை. விக்ரம் லேண்டரை தொடர்பு கொள்ள தொடர்ந்து முயன்று கொண்டு இருக்கிறோம்’’ என தெரிவிக்கப்பட்டுள்ளது.