திரையரங்குகளில் வாக்காளர்களுக்கு கட்டண சலுகை @ ஹரியாணா

மக்களவைத் தேர்தலில் வாக்குரிமையை செலுத்தும் வாக்காளர்களுக்கு திரையரங்குகளில் கட்டண சலுகை வழங்கப்படும் என்று ஹரியாணாவின் குருகிராம் மாவட்ட நிர்வாகம் அறிவித்துள்ளது.

நாடு முழுவதும் 7 கட்டங்களாக மக்களவைத் தேர்தல் நடைபெறுகிறது. இதுவரை 3 கட்ட தேர்தல்கள் நிறைவடைந்துள்ளன. தற்போது கோடை வெயில் சுட்டெரித்து வருவதால் பெரும்பாலான வடமாநிலங்களில் வாக்குப்பதிவு சதவீதம் குறைவாக இருக்கிறது.

மே 13, 20, 25, ஜூன் 1 ஆகிய தேதிகளில் அடுத்தடுத்து தேர்தல் நடத்தப்பட உள்ளது. இந்த தேர்தல்களில் வாக்குப்பதிவு சதவீதத்தை அதிகரிக்க தலைமைத் தேர்தல் ஆணையம் பல்வேறு விழிப்புணர்வு விளம்பரங்களை வெளியிட்டு வருகிறது.

ஹரியாணாவின் 10 மக்களவைத் தொகுதிகளுக்கு வரும் 25-ம் தேதி தேர்தல் நடைபெற உள்ளது. இதில் வாக்குப்பதிவு சதவீதத்தை உயர்த்த ஹரியாணாவின் குருகிராம் மாவட்ட நிர்வாகம் சிறப்பு ஏற்பாடுகளை செய்துள்ளது.

இதன்படி மக்களவைத் தேர்தலில் வாக்குரிமையை செலுத்திய வாக்காளர்களுக்கு குருகிராம் மாவட்ட எல்லைக்கு உட்பட்ட திரையரங்களில் கட்டண சலுகை வழங்கப்பட உள்ளது.

வாக்குப்பதிவு நாளில் விரல் மையை காண்பித்து கட்டண சலுகையை பெற்றுக் கொள்ளலாம். அதோடு திரையரங்க வளாகத்தில் உள்ள ஓட்டல்களிலும் வாக்காளர்கள் கட்டண சலுகையை பெறலாம் என்று குருகிராம் மாவட்ட நிர்வாகம் அறிவித்துள்ளது.

இதுதொடர்பாக மாவட்ட நிர்வாகம் சார்பில் அனைத்து திரையரங்க உரிமையாளர்களுடன் புரிந்துணர்வு ஒப்பந்தம் செய்யப்பட்டு உள்ளது.