லாரி மீது அரசு பஸ் மோதி விபத்து: தெலங்கானாவில் 5 பேர் உயிரிழப்பு

சாலை ஓரத்தில் நின்றுகொண்டிருந்த லாரி மீது இன்று அதிகாலை ஆந்திர அரசு சொகுசு பஸ் மோதி விபத்துக்குள்ளானது. இதில் பஸ் ஓட்டுநர் உட்பட 5 பேர் உயிரிழந்தனர். 14 பேர் படுகாயமடைந்தனர்.

விஜயவாடாவிலிருந்து நேற்று இரவு 36 பயணிகளுடன் ஆந்திர அரசுக்கு சொந்தமான சொகுசு பஸ் ஹைதராபாத்திற்கு புறப்பட்டு சென்றது. அப்போது இன்று அதிகாலை 3 மணியளவில் தெலங்கானா மாநிலம், சூரியாபேட்டை மாவட்டத்தில் பஸ் வேகமாக சென்றபோது, மொத்தல செருவு எனும் இடத்தில், பழுதாகி சாலை ஓரத்தில் ஒரு லாரி நிறுத்தி வைக்கப்பட்டிருந்தது.

அந்த லாரி மீது பஸ் மோதி விபத்துக்குள்ளானது. இந்த விபத்தில் பஸ் ஓட்டுநர் உட்பட 5 பயணிகள் உயிரிழந்தனர். 14 பேர் படுகாயமடைந்தனர். தகவல் அறிந்ததும் சூரியாபேட்டை போலீஸார் சம்பவ இடத்திற்கு சென்று காயமடைந்தவர்களை கோதாடு, சூரியாபேட்டை அரசு மருத்துவமனைக்கு சிகிச்சைக்காக அனுப்பி வைத்தனர். மேலும் இது குறித்து வழக்கு பதிந்து விசாரணை நடத்தி வருகின்றனர்.