வேளாண்மை பல்கலைக்கழகத்தின் மாணவர் சேர்க்கைக்கான தரவரிசைப் பட்டியலை தஞ்சையில் அமைச்சர் வினோத் வெளியிட்டார். உடன் வேளாண்மை உற்பத்தி ஆணையரும், வேளாண்மை மற்றும் உழவர் நலத்துறை செயலாளருமான பொ.சங்கர் உள்ளிட்டோர்.
தஞ்சாவூர்: தமிழ்நாடு வேளாண்மைப் பல்கலைக்கழகத்தின் இளநிலை மாணவர் சேர்க்கைக்கான தரவரிசைப் பட்டியல் வெளியிடும் நிகழ்ச்சி, தஞ்சாவூர் மாவட்டம் ஈச்சங்கோட்டையில் உள்ள டாக்டர் எம்.எஸ்.சுவாமிநாதன் வேளாண்மைக் கல்லூரி மற்றும் ஆராய்ச்சி நிலையத்தில் நேற்று நடைபெற்றது.
வேளாண்மை மற்றும் உழவர் நலத் துறை அமைச்சர் ர.வினோத் தலைமை வகித் தார். வேளாண்மை உற்பத்தி ஆணையரும், வேளாண்மை மற்றும் உழவர் நலத்துறை செயலாளருமான பொ.சங்கர், மாவட்ட ஆட்சியர் ஆர்.ரேவதி, எம்எல்ஏ விஜய் சரவணன், வேளாண்மைப் பல்கலைக்கழக துணைவேந்தர் (பொ) கே.சுப்பிரமணியன், இளநிலை (வேளாண்மை) முதன்மையர் சி.பாபு பங்கேற்றனர்.
தொடர்ந்து, மாணவர் சேர்க்கை-2026 தரவரிசைப் பட்டியலை அமைச்சர் ர.வினோத் வெளியிட்டு பேசியதாவது: இந்த கல்வியாண்டில் இளம் அறிவியல் மாணவர்கள் சேர்க்கைக்காக இணைய வழி மூலம் 14 பாடப்பிரிவுகளுக்கு மே 6 முதல் ஜூன் 17 வரை வரை விண்ணப்பங்கள் பெறப்பட்டன. மொத்தம் பெறப்பட்ட 26,709 விண்ணப்பங்களில் 24,435 விண்ணப்பங்கள் தகுதியானவைகளாக தேர்ந்தெடுக்கப்பட்டன. இதில், 15,757 பேர் பெண்கள்.
இவற்றில் அரசுக் கல்லூரிகளில் 2,856 இடங்களும், தனியார் இணைப்புக் கல்லூரிகளில் அரசு இடஒதுக்கீடான 3,051 இடங்களும் இணைய வழி கலந்தாய்வு மூலம் நிரப்பப்பட உள்ளன. பொது இடஒதுக்கீட்டுக்கான தரவரிசை பட்டியலில் 22,987 விண்ணப்பதாரர்களும், தொழில்முறை கல்வி இடஒதுக்கீட்டில் 1,193 விண்ணப்பதாரர்களும் இடம் பெற்று உள்ளனர். இதர மாநிலத்தை சேர்ந்தவர்கள் 255 பேர்.
இந்த ஆண்டு இளம் அறிவியல் வேளாண்மை மற்றும் தோட்டக்கலை ஆகிய 2 பட்டப்படிப்புகள் தமிழ் வழியில் பயிற்றுவிக்கப்படுகின்றன. அரசு பள்ளி மாணவர்களுக்கான 7.5 சதவீத இடஒதுக்கீட்டில், 418 இடங்களுக்கு 8,746 பேரும், வேளாண் தொழில்கல்வி பயின்ற மாணவர்களுக்கான 5 சதவீத இடஒதுக்கீட்டில் 239 இடங்களுக்கு 1,193 பேரும், சிறந்த விளையாட்டு வீரர்களுக்கான இடஒதுக்கீட்டில் 20 இடங்களுக்கு 190 பேரும், முன்னாள் ராணுவ வீரர்களுக்கான இடஒதுக்கீட்டில் 20 இடங்களுக்கு 170 பேரும், மாற்றுத்திறனாளிகளுக்கான 5 சதவீத இட ஒதுக்கீட்டில் 126 இடங்களுக்கு 27 பேரும் விண்ணப்பித்துள்ளனர்.
சேர்க்கைக்கான இணைய வழி கலந்தாய்வு தேதி உள்ளிட்ட விவரங்கள் https://tnau.ucanapply.com என்ற சேர்க்கைக்கான இணைய தளத்தில் வெளியிடப்படும் என்றார். இந்த தர வரிசைப் பட்டியலில், காட்டுமன்னார்கோவில் மாணவி மெர்லின் மற்றும் ஈரோடு மாணவர் மாதவராஜ் ஆகியோர் 200-க்கு 200 கட் ஆஃப் பெற்று தரவரிசையில் முதலிடம் பிடித்தனர். இவ்வாறு கூறினார்.
