சென்னை: பொறியியல் படிப்புக்கு ஆன்லைனில் விண்ணப்பிக்கும் அவகாசம் ஜூன் 5-ம் தேதி வரை நீட்டிக்கப்பட்டுள்ளது.
சென்னை அண்ணா பல்கலைக்கழக துறைக் கல்லூரிகள், அரசு பொறியியல் கல்லூரிகள், அரசு உதவி பெறும் பொறியியல் கல்லூரிகள், தனியார் சுயநிதி பொறியியல் கல்லூரிகள் என தமிழகத்தில் 440-க்கும் மேற்பட்ட பொறியியல் கல்லூரிகள் உள்ளன. இக்கல்லூரிகளில் சுமார் 1.70 லட்சம் அரசு ஒதுக்கீட்டு இடங்கள் உள்ளன. இவை பொதுக் கலந்தாய்வு மூலம் ஒற்றைச் சாளர முறையில் நிரப்பப்படுகின்றன.
அந்த வகையில், வரும் 2026-27-ம் கல்வி ஆண்டில் அரசு ஒதுக்கீட்டு பொறியியல் இடங்களில் சேருவதற்கான ஆன்லைன் விண்ணப்ப பதிவு கடந்த மே 3-ம் தேதி தொடங்கி நடந்து வருகிறது. நேற்று மாலை நிலவரப்படி 2.87 லட்சத்துக்கும் மேற்பட்ட மாணவ, மாணவிகள் விண்ணப்பித்துள்ளனர்.
விண்ணப்ப அவகாசம் இன்றுடன் (ஜூன் 2) முடிவதாக அறிவிக்கப்பட்டிருந்தது. இந்நிலையில், மாணவர்கள் நலன் கருதி, அவகாசம் ஜூன் 5-ம் தேதி வரை நீட்டிக்கப்படுவதாக தொழில்நுட்பக் கல்வி இயக்ககம் அறிவித்துள்ளது. எனவே, பொறியியல் படிப்பில் சேர விரும்பும் மாணவர்கள் https://www.tneaonline.org என்ற இணையதளம் வாயிலாக 5-ம் தேதி வரை ஆன்லைனில் விண்ணப்பிக்கலாம். சான்றிதழ்களை 6-ம் தேதி வரை பதிவேற்றம் செய்யலாம்.
