சென்னை: சென்னை விமான நிலையத்தில் ரூ.2.30 கோடி மதிப்புள்ள தங்கம் பறிமுதல் செய்யப்பட்டது.
ஐக்கிய அரபு அமீரக தலைநகர் அபுதாபியில் இருந்து இண்டிகோ ஏர்லைன்ஸ் விமானம் சென்னைக்கு வந்தது.
அந்த விமானத்தில் வந்த பயணிகளையும், அவர்களின் உடைமைகளையும் மத்திய வருவாய் புலனாய்வுத்துறை, சுங்கத்துறை அதிகாரிகள் தீவிரமாக சோதனை செய்து அனுப்பி கொண்டிருந்தனர்.
அப்போது வந்த வடமாநிலத்தை சேர்ந்த ராஜீப் இப்ராம் ஷா (42) என்ற பயணி மீது அதிகாரிகளுக்கு சந்தேகம் ஏற்பட்டது. அவரை நிறுத்தி அதிகாரிகள் விசாரணை நடத்தினர். அப்போது, அவர் அதிகாரிகளிடம் கடும் வாக்குவாதத்தில் ஈடுபட்டார்.
இதையடுத்து, அவர் வைத்திருந்த பார்சலை அதிகாரிகள் பிரித்து சோதனை செய்த போது, ரூ.2.30 கோடி மதிப்புள்ள 1.60 கிலோ தங்கப்பசையை மறைத்து வைத்திருந்தது தெரியவந்தது.
தங்கத்தை பறிமுதல் செய்த அதிகாரிகள் அவரை கைது செய்து விசாரணை நடத்தியதில், அவர் ஏற்கெனவே துபாய், அபுதாபி, சார்ஜா, குவைத், சிங்கப்பூர், மலேசியா, இலங்கை உள்ளிட்ட பல்வேறு நாடுகளுக்கு சென்று வந்திருப்பது தெரியவந்தது. அவரிடம் அதிகாரிகள் தொடர்ந்து விசாரணை நடத்தி வருகின்றனர்.
