திரைப்படத்தில் ஒப்பனை (Make-Up) என்பது வெறும் அழகுபடுத்தும் கருவி மட்டுமல்ல. அது ஒரு கதாபாத்திரத்தை உருவாக்கும் முக்கியமான கலை. ஒரு நடிகரை இளமையாகவும், வயதான தோற்றத்திலும், நோயுற்றவராகவும், வீரனாகவும் வில்லனாகவும் மாற்றும் சக்தி ஒப்பனைக்கு உண்டு. ஆனால் ஒரு சிறந்த ஒப்பனை, சரியான ஒளிப்பதிவு இல்லாமல் முழுமையடையாது.
அதேபோல், திறமையான ஒளிப்பதிவாளரும் ஒப்பனையின் தன்மைகளைப் புரிந்து கொள்ளாமல் சிறந்த காட்சிகளை உருவாக்க முடியாது. திரைப்பட வரலாற்றில் ஒப்பனையாளரும், ஒளிப்பதிவாளரும் இணைந்து உருவாக்கிய பல அற்புதங்கள் இன்றும் பேசப்படுகின்றன.
ஒப்பனையின் உலகம்
ஒப்பனை என்பது மனித முகத்திலுள்ள குறைபாடுகளை மறைப்பதற்காக அல்ல; அதிலுள்ள சிறப்பம்சங்களை வெளிப்படுத்துவதற்காகவுமே. ஒவ்வொரு முகமும் தனித்துவமானது. அதற்கேற்ப ஒப்பனையும் மாற வேண்டும். திரைப்படங்களில் பொதுவாக ஒப்பனை நான்கு முக்கிய பிரிவுகளாகப் பார்க்கப்படுகிறது.
அவை, ரியலிஸ்டிக் மேக்கப் (Realistic Make-Up), கிளாமர் மேக்கப் (Glamour Make-Up), கேரக்டர் மேக்கப் (Character Make-Up), ஸ்பெஷல் எஃபெக்ட்ஸ் மேக்கப் (Special Effects Make-Up). ஒவ்வொறு வகையான ஒப்பனைக்கும் ஒளிப்பதிவாளரின் அணுகுமுறையும் மாறுபடும்.
சரும நிறங்கள் மற்றும் ஒப்பனை
ஒவ்வொரு மனிதரின் சரும நிறமும் வேறுபட்டது. இந்தியாவில் மட்டுமே கோதுமை நிறம் (Wheatish), பழுப்பு நிறம் (Brown), அடர் நிறம் (Dark Tone), வெளிர் நிறம் (Fair Tone) போன்ற பல்வேறு சரும நிறங்கள் காணப்படுகின்றன. ஒரு நல்ல ஒப்பனையாளர், நடிகரின் இயல்பான நிறத்தை மறைக்க முயற்சிக்க மாட்டார். மாறாக அந்த நிறத்தின் அழகை மேம்படுத்துவார்.
ஒளிப்பதிவாளருக்கும் இது மிகவும் முக்கியம். ஒரே லைட்டிங் எல்லா விதமான சருமங்களுக்கும் பொருந்தாது. சில முகங்கள் மென்மையான ஒளியில் அழகாகத் தெரியும். சில முகங்கள் அதிக கான்ட்ராஸ்ட் (Contrast) கொண்ட ஒளியில் உயிர்ப்புடன் தோன்றும். அதனால்தான் இன்று டிஜிட்டல் சினிமாவில் கேமரா டெஸ்ட்டுகள் மற்றும் மேக்கப் டெஸ்ட்டுகள் முக்கியமான கட்டமாக மாறியுள்ளன.
முக வடிவமைப்பு மற்றும் ஸ்கல்ப்டிங்
ஒப்பனையின் மிக முக்கியமான அம்சங்களில் ஒன்று ‘ஸ்கல்ப்டிங்’ அல்லது ‘கான்டூரிங்’ (Contouring) எனப்படும். முகத்தில் ஒளி விழும் பகுதிகளையும் நிழல் விழும் பகுதிகளையும் பயன்படுத்தி முகத்தை மறுவடிவமைப்பு செய்வதே இதன் நோக்கம். கன்ன எலும்புகளை உயரமாகக் காட்டலாம். மூக்கை மெலிதாக மாற்றலாம்.
தாடையை வலிமையானதாகத் தோற்றமளிக்க செய்யலாம். கண்களை ஆழமாகக் காட்டலாம். இதனை நிறங்கள் மூலம் மேக்கப் கலைஞர் செய்கிறார். ஒளிப்பதிவாளர் ஒளி மற்றும் நிழல்களால் அதை மேலும் வலுப்படுத்துகிறார். பழைய ஹாலிவுட் நட்சத்திரங்களான மார்லன் பிராண்டோ, எலிசபெத் டெய்லர், கிரிகரி பெக் ஆகியோரின் முக அமைப்புகளை ஒளிப்பதிவாளர்கள் மிகச் சிறப்பாக வெளிப்படுத்தியதற்கு இந்த ‘ஸ்கல்ப்டிங்’ முறைகளும் ஒரு காரணம் எனலாம்.
ரியலிஸ்டிக் மேக்கப்: உண்மையின் அழகு
இன்றைய உலக சினிமாவில் மிகப் பெரிய மாற்றம் ரியலிஸ்டிக் மேக்கப்பில்தான் ஏற்பட்டுள்ளது. முன்பெல்லாம் அதிக பவுடர், அதிக அடித்தளம் (Foundation), அதிக ஒப்பனை பயன்படுத்தப்பட்டன. ஆனால் இன்று பார்வையாளர்கள் இயல்பான தோற்றத்தை விரும்புகிறார்கள்.
கொரிய, ஈரானிய மற்றும் ஐரோப்பியத் திரைப்படங்களில் நடிகர்கள் ஒப்பனை இல்லாதது போலவே தோன்றுவார்கள். ஆனால் உண்மையில் மிகவும் நுட்பமான மேக்கப் பயன்படுத்தப்பட்டிருக்கும்.
சருமத்தின் இயல்பான அமைப்பு, வியர்வை, சின்னச் சின்ன சுருக்கங்கள் போன்றவை பாதுகாக்கப்படுகின்றன. இந்த வகை ஒப்பனைக்கு ஒளிப்பதிவாளரும் மிகவும் கவனமாக இருக்க வேண்டும்.
அதிக ஒளி பயன்படுத்தினால் முகம் செயற்கையாகத் தோன்றிவிடும். கிளாமர் மேக்கப் மற்றும் திரை அழகு விளம்பரங்கள், பாடல் காட்சிகள் மற்றும் நட்சத்திர மையப்படுத்தப்பட்ட திரைப்படங்களில் கிளாமர் மேக்கப் மிக முக்கியப் பங்கு வகிக்கிறது.
இதில், மென்மையான சருமம், பிரகாசமான கண்கள், உதட்டின் நிறம், வலிமை, முகத்தின் ஒளிர்வு ஆகியவை முக்கியத்துவம் பெறுகின்றன. இத்தகைய மேக்கப்புக்குப் பொதுவாக மென்மையான ஒளி (Soft Lighting), பெரிய டிஃப்யூஷன் (Diffusion), பியூட்டி லைட்டிங் (Beauty Lighting) ஆகியவை பயன்படுத்தப்படுகின்றன.
ஃபேஸ் லிஃப்டிங் மற்றும் வயதுக் கட்டுப்பாடு
ஒளிப்பதிவாளர்கள் பல நேரங்களில் ஒப்பனையாளர்களுடன் இணைந்து நடிகர்களை இளமையாகக் காட்டும் முயற்சியில் ஈடுபடுகின்றனர்.
சில நேரங்களில் அதிக ஒளி தேவையில்லை. சிறிய எக்ஸ்போசர் மாற்றம், சரியான கேமரா கோணம், மென்மையான டிஃப்யூஷன் ஃபில்டர் ஆகியவற்றின் மூலம் முகத்தில் ஒளிர்வை அதிகரிக்கலாம்.
சில முகங்களுக்கு மேலும் ஒளி விளக்குகளைச் சேர்ப்பதைவிட, ஒரு டோன் பிரைட்னஸ் (Tone Brightness) மாற்றமே போதுமானதாக இருக்கும். இதனால் சருமத்தின் இயல்பும் காக்கப்படுகிறது.
ஸ்பெஷல் எஃபெக்ட்ஸ் மேக்கப்
திரைப்படங்களில் கதாபாத்திரங்களுக்கு ஏற்படும் உடல் காயங்கள், வெட்டுத் தழும்புகள், தீக்காயங்கள், ரத்தம், உடல் சிதைவுகள் போன்றவை அனைத்தும் ஸ்பெஷல் எஃபெக்ட்ஸ் மேக்கப்பின் பகுதிகளாகும்.
இன்றைய திரைப்படங்களில், செயற்கை ரத்தம், லேடெக்ஸ் காயங்கள், சிலிகான் காய அமைப்புகள், உடல் மாற்றங்கள் போன்றவை பயன்படுத்தப்படுகின்றன. இவை கேமராவில் உண்மையாகத் தோற்றமளிக்க ஒளிப்பதிவாளர் மிகவும் கவனமாக செயல்பட வேண்டும். தவறான ஒளியில் அவை பொம்மை போன்ற தோற்றத்தை அளித்துவிடும்.
புரோஸ்தெடிக் மேக்கப்
புரோஸ்தெடிக் (Prosthetic) மேக்கப் என்பது ஒப்பனையின் மிக உயர்ந்த வடிவங்களில் ஒன்று. ஒரு நடிகரை முற்றிலும் வேறு மனிதராக மாற்றுவதற்காக சிலிகான், ரப்பர் மற்றும் பல்வேறு செயற்கைப் பொருட்கள் பயன்படுத்தப் படுகின்றன.
இந்த வகை ஒப்பனைக்கு அதிக வெப்பம் ஆபத்தானது. அது ஒட்டும் பொருட்களை பலவீனப்படுத்தலாம். எனவே ஒளிப்பதிவாளர்கள், குளிர்ச்சியான LED விளக்குகள், குறைந்த வெப்ப உமிழ்வு கொண்ட லைட்டிங், வேகமான படப்பிடிப்பு முறை ஆகியவற்றைப் பயன்படுத்துகின்றனர்.
ஹாலிவுட்டில் டார்க்கஸ்ட் ஹவர், த க்யூரியஸ் கேஸ் ஆஃப் பெஞ்சமின் பட்டன் போன்ற திரைப்படங்கள் இதற்கு மிகச்சிறந்த உதாரணங்கள்.
ஒளிப்பதிவாளருக்கான மேக்கப் அறிவு
ஒரு சிறந்த ஒளிப்பதிவாளர் லென்ஸ்ஸுகள், கேமராக்கள் மற்றும் ஒளிவிளக்கு களை மட்டும் அறிந்திருந்தால் போதாது. அவர் ஒப்பனையின் அடிப்படைகளையும் அறிந்திருக்க வேண்டும். ஏனெனில், எந்த சரும நிறம் எந்த ஒளியில் சிறப்பாகத் தெரியும்?, எந்த மேக்கப் எவ்வளவு ஒளியைப் பிரதிபலிக்கும்?, எந்த வகை பவுடர் முகத்தில் பிரகாசத்தை ஏற்படுத்தும்?, எந்த வகை காய ஒப்பனை எந்த லென்ஸில் உண்மையாகத் தெரியும்? என்பனவற்றை அறிந்திருப்பது அவசியம்.
திரைப்படத்தில் ஒப்பனையும் ஒளிப்பதிவும் ஒன்றுக்கொன்று எதிரானவை அல்ல; அவை ஒன்றையொன்று பூர்த்தி செய்யும் கலைகள். ஒப்பனையாளர் முகத்தை சிற்பமாக வடிவமைக்கிறார். ஒளிப்பதிவாளர் அந்தச் சிற்பத்துக்கு உயிர் கொடுக்கிறார். இருவரின் கூட்டு முயற்சியால்தான் நடிகர் மறக்கமுடியாத கதாபாத்திரமாக திரையில் மாறுகிறார்.
(புதன்தோறும் ஒளிகாட்டுவோம்)