தமிழில், தில், கில்லி உள்பட பல்வேறு படங்களில் வில்லன், குணசித்திர வேடங்களில் நடித்திருப்பவர் ஆஷிஷ் வித்யார்த்தி. இந்தி, தெலுங்கு உள்பட பல்வேறு மொழிகளில் நடித்து வருகிறார். இவர், தன்னம்பிக்கை பேச்சாளராகவும் இருக்கிறார்.
இவரும் இவர் மனைவி ரூபாலி பருவாவும் குவாஹாட்டியில் சாலையை கடக்கும்போது, வேகமாக வந்த இருசக்கர வாகனம் மோதி காயமடைந்தனர். உடனடியாக மருத்துவமனையில் சேர்க்கப்பட்ட அவர்களுக்கு சிகிச்சை அளிக்கப்பட்டது.
இதுபற்றி வீடியோ ஒன்றில் தெரிவித்துள்ள ஆஷிஷ் வித்யார்த்தி, “விபத்து நடந்தது உண்மை தான். எனக்கு பெரிய காயம் ஏதுமில்லை. நான் நலமாக இருக்கிறேன். என் மனைவிக்குச் சிகிச்சை அளிக்கப்பட்டு வருகிறது. உங்களுக்குத் தெரியப்படுத்தவே இதைச் சொல்கிறேன். இதை பரபரப்பாக்க வேண்டியதில்லை. விபத்தை ஏற்படுத்திய பைக் ஓட்டியவர் குறித்தும் விசாரித்தேன், அவருக்கும் சுய நினைவு திரும்பிவிட்டது. எல்லோரும் நலமாக இருக்கிறோம்” என்றார்.
